Մառնեուլիում բենզինի գինը բարձրացնելու համար ձերբակալվել է վրացական ընկերության սեփականատերը

Հոդվածի թարգմանությունը՝ OC Media-ի հետ համագործակցության շրջանակում։

Վրաստանի իշխանությունները ձերբակալել են Մառնեուլիում գործող Mamed Gas ընկերության ղեկավար Նարիման Ալլահվերդիևին․ նա չէր ներկայացել դատարան՝ Վրաստանի էներգետիկայի և ջրամատակարարման կարգավորող ազգային հանձնաժողովի (GNERC) հետ ֆինանսական վեճի շրջանակում։ Ադրբեջանի պետական SOCAR էներգետիկ ընկերությունը, որը վառելիք էր մատակարարում Ալլահվերդիևի ընկերությանը, դեռ հուլիսի վերջին չեղարկել էր դրա բաշխման լիցենզիան։

Տեղական Radio Marneuli-ի հաղորդմամբ՝ վեճի հիմնական պատճառը բենզինի սակագինն էր։ Ալլահվերդիևը մեկ լիտրի համար պահանջում էր 0,57 լարի (0,22 դոլար), մինչդեռ GNERC-ի սահմանած սակագինը 0,47 լարի է (0,18 դոլար)։

SOCAR-ը, որը Վրաստանում նաև բենզալցակայանների ցանց է շահագործում, սոցիալական ցանցերում հրապարակած հայտարարությունում նշել է, որ Ալլահվերդիևը չի վճարել սուբսիդավորվող վառելիքի դիմաց և կուտակել է հարյուր հազարավոր լարիների պարտք։ Ընկերությունը նաև պնդել է, որ նա շարունակել է վառելիք վաճառել Մառնեուլիի Կիզիլաջլո գյուղում՝ չնայած SOCAR-ը կասեցրել էր նրա ընկերության բաշխման լիցենզիան։

SOCAR Georgia Gas-ը նաև Mamed Gas-ին մեղադրել է լիցենզիայի չեղարկումից հետո գյուղում գործունեությունը շարունակելու և առանձին բաժանորդների գազամատակարարումն ինքնակամ դադարեցնելու մեջ։

«Mamed Gas ՍՊԸ-ն շարունակում է ապօրինի գործողությունները և Կիզիլաջլոյում դադարեցնում է առանձին բաժանորդների գազամատակարարումը»,- հայտարարել է SOCAR-ը՝ պնդելով, որ ընկերությունը «շարունակում է սադրել, ահաբեկել և մոլորեցնել բնակչությանը»։

Ալլահվերդիևի նկատմամբ հետաքննություն է ընթանում ապօրինի ձեռնարկատիրական գործունեության մեղադրանքով։ Մեղավոր ճանաչվելու դեպքում նրան սպառնում է տուգանք կամ մինչև երեք տարվա ազատազրկում։