Կիևի մոտ ռուսական հարվածից և զինամթերքի պայթյուններից 37 մարդ է զոհվել

Կիևի մարզի Բուչայի շրջանում ռուսական հարվածից և դրան հաջորդած զինամթերքի պայթյուններից առնվազն 37 մարդ է զոհվել, ևս 42-ը՝ վիրավորվել, հաղորդում է BBC-ն՝ հղում անելով ուկրաինական իշխանություններին։ Վիրավորների թվում չորս երեխա կա։

Կիևի մարզային վարչակազմի ղեկավար Թիմուր Տկաչենկոյի խոսքով՝ զոհվածներից 34-ը գտնվել են տարեցների խնամքի պանսիոնատում։ Զոհվել է նաև Դմիտրովկա համայնքի ղեկավար Տարաս Դիդիչը, որը, ըստ Տկաչենկոյի, առաջիններից էր, որ մեկնել էր դեպքի վայր։

Միջադեպը տեղի է ունեցել օգոստոսի 29-ի գիշերը Բուչայի շրջանի Միլա գյուղում։ Ուկրաինական իշխանությունների տվյալներով՝ ռուսական հարվածից հետո ձեռնարկություններից մեկում մի շարք պայթյուններ են տեղի ունեցել և խոշոր հրդեհ է բռնկվել։ Մոտ 400 մարդ տարհանվել է վտանգավոր գոտուց։

Ռուսաստանի պաշտպանության նախարարությունը հայտարարել է, որ Միլայում խոցել է Fire Point ընկերության զինամթերքի պահեստը։ Ըստ ռուսական կողմի՝ այնտեղ պահվել են FP-1 և FP-2 հեռահար անօդաչուների բաղադրիչներ և մեկնարկային արագացուցիչներ։

Ուկրաինայի նախագահ Վլադիմիր Զելենսկին ասել է, որ առաջին հարվածը հասցվել է զինամթերքի պահեստավորման վայրին, որին հաջորդել է արկերի, ականների, այլ զինամթերքի և անօդաչուների լայնածավալ դետոնացիա։ Նա միաժամանակ քննադատել է պահեստի տեղակայումը բնակելի տարածքի մոտ՝ դա անվանելով ծանր անփութություն։

Ուկրաինայի ոստիկանությունը հայտնել է, որ վնասվել են բնակելի տներ, տարեցների և հաշմանդամություն ունեցող անձանց պանսիոնատը և այլ ենթակառուցվածքներ։ Տկաչենկոյի տվյալներով՝ տարբեր աստիճանի վնաս է ստացել մոտ 50 բնակելի տուն։

Դեպքի առնչությամբ Ուկրաինայի ոստիկանությունը և Անվտանգության ծառայությունը նախաքննություն են սկսել պաշտոնեական անփութության հոդվածով։ Զելենսկին հայտարարել է, որ մարդկանց մահվան համար պատասխանատուները պետք է պատասխանատվության ենթարկվեն։