Հոդվածի թարգմանությունը՝ OC Media-ի հետ համագործակցության շրջանակում։
Վրաստանի Հանրային պաշտպանի գրասենյակը նախազգուշացում է տարածել՝ Թբիլիսիի քաղաքապետարանին կոչ անելով հետաքննել Ռուսթավելի պողոտայի ընթացիկ վերականգնման աշխատանքների ժամանակ ենթադրաբար հայտնաբերված ասբեստի առկայությունը։
Գրասենյակը հայտարարությամբ հանդես եկավ, երբ օգոստոսի 21-ին համացանցում տարածվեցին Ռուսթավելի պողոտայում հայտնաբերված ասբեստի նմանվող նյութի լուսանկարներ։ Սոցիալական ցանցերի օգտատեր Իրակլի Պիպիան հայտնել է, որ խորհրդային իշխանությունները պողոտայի տակ ջրատար խողովակներ կառուցելիս ասբեստ են օգտագործել։
Ըստ քաղաքային և բնապահպանական ակտիվիստ Նատա Փերաձեի՝ ջարդված ասբեստից խողովակներից նմուշներ են վերցվել և պատրաստ են ուղարկվելու Բեռլինի լաբորատորիա։ Նա հավելել է, որ փորձաքննության համար անհրաժեշտ է գումար հավաքել։
«Ասբեստը առողջության համար բարձր վտանգ ներկայացնող նյութ է, և դրա ազդեցությունը կապված է ծանր հիվանդությունների, այդ թվում՝ մեզոթելիոմայի և թոքերի քաղցկեղի հետ։ Վտանգը կտրուկ մեծանում է նյութի մեխանիկական մշակման՝ կտրելու, ջարդելու, հորատելու և հողից հեռացնելու ժամանակ։
«Վրաստանում ասբեստի կարգավորման միջազգային չափանիշները լիարժեք չեն ներդրվել, և չեն ընդունվել տեխնիկական կանոնակարգեր, որոնք կկարգավորեին աշխատավայրում ասբեստի ազդեցությունից աշխատողների պաշտպանությունը»,- հայտնել է Վրաստանի Հանրային պաշտպանի գրասենյակը։
Այն նաև զգուշացրել է, որ պողոտայի հարակից դպրոցներում դասերը սկսվելու են սեպտեմբերի 15-ին, և աշակերտները կարող են ասբեստի ազդեցության ենթարկվել․
«Երեխաները հատկապես խոցելի են ասբեստի ազդեցության նկատմամբ, քանի որ նրանց շնչառական համակարգը դեռ ձևավորման փուլում է, իսկ ասբեստի հետ կապված հիվանդությունների գաղտնի շրջանը կարող է տևել տասնամյակներ»։
Հանրային պաշտպանի գրասենյակը Թբիլիսիի քաղաքապետարանին կոչ է արել պարզել՝ արդյոք վերանորոգվող հատվածում հայտնաբերված նյութը ասբեստ է պարունակում, ինչպես նաև հանրությանը տեղեկացնել խնդրի մասին։
2019-ին ԵՄ-ում ավելի քան 70 հազար մարդ մահացել է աշխատավայրում նախկինում ասբեստի ազդեցության ենթարկվելու հետևանքով։
Ռուսթավելի պողոտայի վերանորոգման հարցը իշխանությունները քննարկում էին դեռ 2023-ից։ Աշխատանքները սկսվել են 2026-ի հուլիսի վերջին, իսկ դրանց ավարտը նախատեսված է նոյեմբերին։
Վերականգնման աշխատանքներն իրականացնող շինարարական ընկերությունը սահմանված ժամանակացույցը չպահպանելու համար չորս անգամ տուգանվել է՝ ընդհանուր 5000 լարիով (1900 դոլար)։
Ռուսթավելի պողոտան պատմականորեն եղել է բազմաթիվ զանգվածային ցույցերի և ցուցարարների ու հատուկ նշանակության ոստիկանության միջև բախումների վայր։
Պատմություններ
