Սամվել Գրիգորյանը նշանակվել է 3-րդ բանակային կորպուսի հրամանատար

Oգոստոսի 31-ին վարչապետի առաջարկությամբ նախագահ Վահագն Խաչատուրյանը Սամվել Գրիգորյանը նշանակել է 3-րդ բանակային կորպուսի հրամանատար։

Այս ամիս բանակում կադրային որոշ փոփոխություններ են տեղի ունեցել՝ կապված խաղաղ պայմաններում գրանցված մահերի հետ։

Այդ փոփոխություններից առանցքայինը Ռազմական ոստիկանությունում էր, օգոստոսի 17-ին Աշոտ Զաքարյանը ազատվեց պետի պաշտոնից, իսկ նրա փոխարեն նշանակվեց գեներալ-մայոր Արամ Հովհաննիսյանը, որը 2023-ին նշանակվել էր ՆԳ նախարարի տեղակալ-ոստիկանապետ, իսկ 2025-ի հունիսին սեփական դիմումի համաձայն ազատվել։

Այնուհետև պաշտոնանկ արվեց նաև բարոյահոգեբանական ապահովման վարչության պետը՝ Սերյոժա Ստեփանյանը։

Կադրային փոփոխությունները տեղի էին ունեցել բանակում զինծառայողների մահվան դեպքերի վերաբերյալ քննարկումների ակտիվացման պայմաններում։ ՊՆ-ի տվյալներով՝ 2026-ի ութ ամիսներին գրանցվել է մահվան 11 դեպք, որից 6-ը, ըստ գերատեսչության, կապված են ինքնասպանության կամ ինքնասպանության հասցնելու դեպքերի հետ։ 

Քաղհասարակության ներկայացուցիչները, սակայն, ավելի բարձր թիվ են հրապարակում։ Հելսինկյան քաղաքացիական ասամբլեայի Վանաձորի գրասենյակի տվյալներով՝ 2026-ի առաջին ութ ամիսներին արձանագրվել է զինծառայողների մահվան 31 դեպք։