Սեպտեմբերի 10-ից «Լամբադա» կամուրջը կփակվի․ երթևեկության նոր կանոններ կգործեն

Սեպտեմբերի 10-ից «Լամբադա» տրանսպորտային հանգույցում մեկնարկող հիմնանորոգման աշխատանքներով պայմանավորված՝ փակվելու է Կոմիտասի պողոտա–Դավիթ Անհաղթ փողոց ուղեանցը, իսկ հանգույցի շրջանաձև երթևեկության խաչմերուկում գործելու են երթևեկության կազմակերպման նոր կանոններ ու սահմանափակումներ, հայտնում են Երևանի քաղաքապետարանից:

Ըստ նոր կարգավորումների՝ Կոմիտասի պողոտայով և Դավիթ Անհաղթ փողոցով խաչմերուկ մոտեցող տրանսպորտային միջոցների վարորդները կհամարվեն գլխավոր ճանապարհով երթևեկողներ, որոնք կարող են երթևեկել ուղիղ կամ աջ ուղղություններով,

Ազատության պողոտայից խաչմերուկ մոտեցող տրանսպորտային միջոցների վարորդները կհամարվեն երկրորդական ճանապարհով երթևեկողներ, որոնք կարող են երթևեկել միայն աջ ուղղությամբ,

Կոմիտասի պողոտայով դեպի Կոմիտասի պողոտա–Շահսուվարյան փողոցների խաչմերուկ երթևեկող և Դավիթ Անհաղթի փողոցով դեպի Դավիթ Անհաղթի– Ուլնեցու փողոցների խաչմերուկ ուղղությամբ երթևեկող տրանսպորտային միջոցների վարորդների համար կկազմակերպեն հետադարձի տեղեր։