Ռուսաստանի հետ քննարկում ենք մետրոյի «Աջափնյակ» կայարանի կառուցման հարցը։ Այս մասին սեպտեմբերի 3-ին՝ կառավարությունում ճեպազրույցի ժամանակ, ՍիվիլՆեթի հարցին ի պատասխան՝ հայտնել է վարչապետ Նիկոլ Փաշինյանը։
«Իրենք մեծ փորձ ունեն այստեղ և ուրախ կլինենք, որ իրենք այդ հարցում մեզ աջակցեն։ Մենակ Աջափնյակի մասին չէ։ Երևանի Մետրոպոլիտենի զարգացման նոր փուլի մեկնարկը մի կայարանով չի․․․ մի կայարան ասում ենք այդպես վախեցած, լարված, որ այդ մի կայարանը բարեհաջող կառուցենք, ավարտվենք, հետո դրանից հետո երկրորդ, երրորդ։ Այս պահին տեսադաշտում առնվազն չորս նոր կայարանի տեսլական կա, որ մետրոյի ճյուղը Աջափնյակով, Ակադեմիական քաղաքով գնա և կպնի Չարբախ կայարանին և մենք մետրոյի շրջանաձև երթևեկության հնարավորություն ունենանք»,- ասել է Փաշինյանը։
Երևանի քաղաքապետ Տիգրան Ավինյանը հուլիսի 6-ին գործակարգավարական նիստի ժամանակ հայտարարել էր, որ «Աջափնյակ» մետրոյի կայարանի կառուցման ծրագիրը ստացել է Հայաստանի կառավարության ֆինանսական հաստատումը, և առաջիկա մեկ-երկու ամսվա ընթացքում կորոշվի դրա իրականացման հստակ ձևաչափը։ Ավինյանի խոսքով՝ կայարանի կառուցման նախագիծն ու նախահաշիվն արդեն պատրաստ են, և այն գործադիրի կողմից հաստատված ենթակառուցվածքային խոշոր փաթեթի ամենահասուն ու իրականացմանը մոտ գտնվող կոմպոնենտն է։
Պատմություններ
