Հայաստանում խմելու և ոռոգման ջրի մատակարարման ոլորտում առկա են էական և շոշափելի խնդիրներ, որոնք վերաբերում են հանրապետության բոլոր բնակավայրերին: Այս մասին ասել է վարչապետ Նիկոլ Փաշինյանը սեպտեմբերի 4-ին՝ «Ջրային ոլորտի բարեփոխումներ 2026-2031» թեմայով աշխատաժողովի ժամանակ։
Կառավարության ղեկավարի խոսքով՝ վարելահողերի ու այգիների միայն փոքր մասն ունի ոռոգման հասանելիություն, իսկ առկա տեխնոլոգիաներն անարդյունավետ են և հանգեցնում են ջրային ռեսուրսների գերծախսի։
«Մեր վարելահողերի մեծ մասը ընդհանրապես ոռոգմանը հասանելիություն չունի։ Այն հատվածներում, որտեղ կա ոռոգում, առանձին անդրադարձի թեմա է ոռոգման տեխնոլոգիաները և որակը։ Եթե 21-րդ դարի չափանիշներով նայենք, այն ջրաքանակը, որ անհրաժեշտ է տասնյակ հեկտարներով այգիներ ոռոգելու համար, այդ ջրաքանակը մենք օգտագործում ենք մի քանի հեկտար այգի ոռոգելու համար»,- ասել է վարչապետը։
Նա նշել է, որ Հայաստանում կան հազարավոր հեկտարներով ամայի հողատարածքներ, որոնք կարող էին օգտագործվել գյուղատնտեսական նպատակներով, սակայն ջրի բացակայության պատճառով մնում են անմշակ։ Բացի այդ, երկրում լուրջ խնդիր է օգտագործված ջրերի մաքրումը, որը ներկայումս բացառություն է, այլ ոչ թե կանոն՝ առաջացնելով բնապահպանական և առողջապահական հետևանքներ։
«Ակնհայտ է նաև, որ ջրի օգտագործման այսպիսի որակը որևէ կերպ չի կարող ընդունելի լինել, որովհետև այն իր հետ ակնհայտորեն բերում է հետևանքներ։ Մենք նույնիսկ շատ հետևանքների հետագծելիությունն ի վիճակի չենք տեսնել և տեղորոշել, բայց ակնհայտ է, որ մենք այս պրոբլեմն ունենք»,- ասել է վարչապետը։
Անդրադառնալով ջրային ռեսուրսների կառավարմանը՝ Փաշինյանը շեշտել է, որ Հայաստանում ձևավորվում է բավարար ջրային պաշար, սակայն անհրաժեշտ է ստեղծել արդյունավետ կուտակման համակարգեր։ Կառավարությունը նախատեսում է մշակել ջրային ոլորտի բարեփոխումների գործնական ճանապարհային քարտեզ՝ ներգրավելով պետական մարմիններին, փորձագիտական հանրությանը, մասնավոր հատվածին և համայնքներին։
Վարչապետը նաև ընդգծել է ջրի նկատմամբ տնտեսական վերաբերմունքի և հիմնավորված սակագնային քաղաքականության անհրաժեշտությունը։ Նրա խոսքով՝ գործող սակագները չեն արտացոլում իրականությունը, իսկ ոռոգման համակարգը մեծապես սուբսիդավորվում է պետության կողմից։ Կառավարությունը նպատակ ունի ազատականացնել ջրային շուկան և ստեղծել պայմաններ մասնավոր ներդրումների համար՝ ջուրը դարձնելով շուկայական հարաբերությունների առարկա։
Պատմություններ
