Իրանի արտաքին գործերի նախարար Աբբաս Արաղչին հեռախոսազրույցներ է ունեցել Սաուդյան Արաբիայի և Թուրքիայի իր գործընկերներ Ֆեյսալ բին Ֆարհանի և Հաքան Ֆիդանի հետ, հաղորդում է IRNA-ն։
Սեպտեմբերի 5-ի երեկոյան կայացած առանձին հեռախոսազրույցների ընթացքում կողմերը քննարկել են երկկողմ հարաբերություններին վերաբերող հարցեր, տարածաշրջանային զարգացումները, ինչպես նաև տարածաշրջանում կայունության վերականգնմանն ուղղված վերջին դիվանագիտական ջանքերը։
Զրույցների ընթացքում անդրադարձ է եղել նաև Հորմուզի նեղուցում ստեղծված անկայուն իրավիճակին, որը, ըստ իրանական կողմի, պայմանավորված է Միացյալ Նահանգների ագրեսիվ գործողություններով։
Սեպտեմբերի 4-ին ԱՄՆ փոխնախագահ Ջեյ Դի Վենսը հայտարարել էր, որ Վաշինգտոնը չի պատրաստվում բանակցել Թեհրանի հետ, քանի դեռ իրանական ուժերը չեն դադարեցրել Հորմուզի նեղուցում առևտրային նավերի վրա հարձակումները։
Փետրվարի 28-ին Իսրայելն ու ԱՄՆ-ն լայնածավալ ռազմական հարձակում սկսեցին Իրանի դեմ, որին ի պատասխան Թեհրանը հարվածներ հասցրեց Իսրայելին և տարածաշրջանում տեղակայված ամերիկյան ռազմաբազաներին։ Ապրիլի 8-ին Իրանն ու ԱՄՆ-ն հրադադարի համաձայնության հասան և ակտիվ բանակցություններ սկսեցին, սակայն հուլիսի 10-ին իրավիճակը կրկին սրվեց։ ԱՄՆ նախագահ Դոնալդ Թրամփը Թեհրանին մեղադրեց բանակցությունները ձգձգելու մեջ և հրամայեց վերսկսել ռազմական գործողությունները։ Այդ ժամանակից ի վեր կողմերի միջև պարբերաբար փոխադարձ հարվածներ են տեղի ունենում։
Պատմություններ
