Քաղաքապետ Տիգրան Ավինյանը հայտարարել է, որ Երևան քաղաքում ներքաղաքային ուղևորափոխադրումներ պետք է իրականացնեն բացառապես համայնքային կառույցները, իսկ մարզային տրանսպորտը չպետք է սպասարկի ներքաղաքային ուղևորահոսքը և ծանրաբեռնի մայրաքաղաքի փողոցները։
«Մարզային տրանսպորտը չպետք է ներքաղաքային տրաֆիկ տեղափոխի և ծանրաբեռնի մեր փողոցները»,- ավագանու նիստի ժամանակ ասել է քաղաքապետ Տիգրան Ավինյանը։
Փոխքաղաքապետ Սուրեն Գրիգորյանը լրագրողների հետ զրույցում պարզաբանել է, որ համայնքային ուղևորափոխադրումները պետք է իրականացվեն համապատասխան համայնքից Երևանի ավտոկայան, և Երևանի ներսում կանգառ չիրականացնեն։ Ըստ փոխքաղաքապետի՝ համայնքային ուղևորափոխադրում իրականացնող ընկերությունները չպետք է զուգահեռ գործունեություն իրականացնեն «Երևան ավտոբուս»-ի, «Երևանի էլեկտրատրանսպորտ»-ի և Երևանի մետրոպոլիտենի հետ ու խցանումների պատճառ դառնան։
«Երևանի ամեն կանգառում իրականացնելով կանգառ, փաստացի իրականացվում է զուգահեռ գործունեություն Երևան համայնքի տրանսպորտին և լրացուցիչ ծանրաբեռնվածություն, ըստ այդմ երկար է մնում էդ մեծ ավտոբուսը երթևեկության մեջ, ինչը նույնպես ծանրաբեռնում է երթևեկությունը, որովհետև քննարկման ընդհանուր կոնտեքստը խցանումներն է Երևան քաղաքում»,- ասել է փոխքաղաքապետը:
Փոխքաղաքապետը չի բացառել, որ կարող են վարչարարություն իրականացնել համայնքային ուղևորափոխադրում իրականացնող ընկերությունների նկատմամբ։
«Չի բացառվում, որ մենք հիմա որոշակի վարչարարություն սկսենք իրականացնել, որովհետև այսօր էլ է այդ կանոնները խախտվում, էնպես չի, որ այսօր օրինական ա․․․»,- ասել է փոխքաղաքապետը:
Պատմություններ
