Անդրանիկ Թևանյանի խափանման միջոցը երկարացվել է ևս երեք ամսով, իսկ Արեգնազ Մանուկյանի կալանքի ժամկետը՝ մեկ ամսով։ Այս մասին հայտնել է փաստաբան Տաթևիկ Սողոյանը։
Մայիսի 20-ին՝ նախընտրական քարոզարշավի ժամանակ, վարչապետ Նիկոլ Փաշինյանը հայտարարել էր, որ հաջորդ օրը՝ մայիսի 21-ին, ԱԱԾ-ն հանցագործության մասին հաղորդում կներկայացնի Քննչական կոմիտե։ Փաշինյանն ասել էր, որ ակնկալում է՝ «Մայր Հայաստան» դաշինքի առաջնորդ Անդրանիկ Թևանյանի դեմ քրեական գործ կհարուցվի «հայրենիքի դավաճանության» հոդվածով։
Մայիսի 21-ին Քննչական կոմիտեն Թևանյանի նկատմամբ քրեական վարույթ նախաձեռնեց՝ պետական դավաճանության և լրտեսության մեղադրանքով։ Հաջորդ օրը Դատախազությունը դիմեց Կենտրոնական ընտրական հանձնաժողով՝ Թևանյանին անձեռնմխելիությունից զրկելու համաձայնություն ստանալու համար։ ԿԸՀ-ն նույն օրը տվեց համաձայնությունը։
Ըստ իրավապահների՝ Թևանյանը, հավաքագրվելով օտարերկրյա հատուկ ծառայությունների կողմից, խոշոր գումարի դիմաց արտասահմանյան կառույցի ներկայացուցչին է փոխանցել գաղտնի տեղեկություններ։ Գործը վերաբերում է 2024 թվականի ապրիլին Ազգային ժողովում անցկացված փակ, գաղտնի նիստի լսումների ընթացքի և արդյունքների վերաբերյալ ռուսերեն թարգմանված տեղեկություններին։
Թևանյանը մեղադրանքը չի ընդունում։
Նա ձերբակալվել է մայիսի 21-ին, այնուհետև դատարանի որոշմամբ կալանավորվել երկու ամսով։ Հուլիսի 22-ին դատարանը ևս երկու ամսով երկարաձգել էր նրա կալանքի ժամկետը։
Հուլիսի 9-ին ձերբակալվել, ապա կալանավորվել է նաև «Բարգավաճ Հայաստան» կուսակցության պատգամավորի թեկնածու, «Մայր Հայաստան» կուսակցության վարչության անդամ Արեգնազ Մանուկյանը։ Նրա նկատմամբ հանրային քրեական հետապնդում է հարուցվել պետական գաղտնիք պարունակող տեղեկություններ հրապարակելու հոդվածով։
Պատմություններ
