Ադրբեջանի արտգործնախարար Ջեյհուն Բայրամովը Երևանի հետ խաղաղության պայմանագրի կնքումը կրկին կապել է Հայաստանի սահմանադրական փոփոխությունների հետ։ Այդ մասին նա խոսել է սեպտեմբերի 9-ին ադրբեջանցի լրագրողների հետ ճեպազրույցում՝ նշելով, որ Բաքվի դիրքորոշումն անփոփոխ է այդ հարցում։
«Նոր սահմանադրության ընդունման ժամանակացույցը Հայաստանի ներքին գործն է։ Հայաստանի վարչապետը ընտրություններից [խորհրդարանական] հետո ուղերձ է հղել, որ սահմանադրության տեքստը հասակարությանը կներկայացվի ընթացիկ տարվա վերջին», - հայտարարել է Բայրամովը։
Ադրբեջանի արտգործնախարարը անդրադարձել է նաև «Թրամփի ուղի» (TRIPP) նախագծին՝ հայտարարելով, որ հաղորդուղու կառուցումը առանց Ադրբեջանի անհնար է։
«ԱՄՆ-ի գործընկերները Ադրբեջանին պարբերաբար տեղեկացնում են TRIPP-ի ընթացքի մասին։ Եվ դա շատ բնական է, քանի որ առանց Ադրբեջանի մասնակցության այդ կապուղու իրագործումը անհնարին է։ Մեզ տեղեկացրել են, որ աշխատանքները շարունակվում են, իսկ շինարարությունը կսկսվի 2027 թվականին», - նշել է Բայրամովը։
Հայաստանում ԱՄՆ գործերի ժամանակավոր հավատարմատար Դևիդ Ալենը սեպտեմբերի 8-ին Բաքվում հանդիպել է Ադրբեջանի արտաքին գործերի նախարարի տեղակալ Էլնուր Մամադովին։ Հանդիպման ընթացքում քննարկվել են Հայաստանի և Ադրբեջանի միջև հարաբերությունների կարգավորման, խաղաղ գործընթացի առաջմղման, երկարատև ու կայուն խաղաղության ապահովման, ինչպես նաև տարածաշրջանում կայունության և անվտանգության ամրապնդմանն ուղղված քայլերը, քննարկվել է նաև TRIPP-ի իրագործումը։
Պատմություններ
