Երևան քաղաքի բարձր ռիսկայնության աստիճանի օբյեկտների վերաբերյալ տեղեկատվությունն այսուհետ հասանելի է միասնական 3D հարթակում։ Երևանի քաղաքապետարանի աշխարհագրական տեղեկատվական համակարգի եռաչափ մոդելների հարթակը ներկայացվեց քաղաքապետարանի սեպտեմբերի 14-ի աշխատանքային նիստում։
Հարթակում ներկայացված են Երևանում կառուցվող և նախագծվող շենքերի եռաչափ մոդելները, որոնք հնարավորություն են տալիս պատկերացում կազմել նախատեսվող կառուցապատման դիրքի, ծավալատարածական հորինվածքի և արտաքին տեսքի մասին։
3D մոդելներին զուգահեռ հասանելի է նաև համապատասխան քաղաքաշինական փաստաթղթերի վերաբերյալ տեղեկատվությունը՝ կառուցապատող ընկերության, կառույցի նշանակության, նախագծման և շինարարության թույլտվությունների, ինչպես նաև դրանց գործողության ժամկետների մասին։
Երևանի քաղաքապետ Տիգրան Ավինյանը նշեց, որ հարթակը կարևոր է ինչպես երևանցիների, այնպես էլ քաղաքում անշարժ գույք ձեռք բերել ցանկացողների համար։
«Կարծում եմ՝ մենք նմանատիպ հարթակներ, որտեղ հստակ երևում է, թե քաղաքային պլանավորումն ու զարգացումը ինչ ուղղություններով է գնում, պետք է մաքսիմալ շատ տրամադրենք մարդկանց և մարդկանց նաև տեղեկացնենք նման հարթակների մասին»,- ասաց Ավինյանը։
Քաղաքապետարանի ներկայացմամբ՝ հարթակը դեռևս զարգացման փուլում է։ Նախատեսվում է այն շարունակաբար համալրել նոր քաղաքաշինական ծրագրերով, ինչպես նաև արդեն ներկայացված նախագծերի վերաբերյալ թարմացված տեղեկություններով, այդ թվում՝ շինարարության թույլտվությունների գործողության ժամկետների երկարաձգման մասին տվյալներով։
Պատմություններ
