Հայաստանը պատրաստ է ԱՄՆ-ի հետ քննարկել ցանկացած հարց, ասում է դեսպանը՝ Իրանի մասին հարցին պատասխանելով

Սիրանուշ Ադամյան

Հայաստանը պատրաստ է Միացյալ Նահանգների հետ քննարկել ցանկացած հարց, հայտարարել է ԱՄՆ-ում Հայաստանի դեսպան Նարեկ Մկրտչյանը՝ պատասխանելով այն հարցին, թե արդյոք Երևանը կդիտարկի հարևան Իրանին մեկուսացնելու հնարավորությունը, եթե Վաշինգտոնից խնդրանք լինի։

«Աշխարհում չկա այնպիսի թեմա, որը հնարավոր չէ քննարկել»,- ասել է Մկրտչյանը Ռոբերտ Շերմանի հետ The Hill’s Frontlines հաղորդմանը տված հարցազրույցում։ «Ամեն ինչ ենթակա է քննարկման, և ամեն ինչ կարող է դիտարկվել»։

Մկրտչյանը չի ասել, թե Միացյալ Նահանգները Հայաստանին նման խնդրանք է ներկայացրել՝ մեկուսացնելու Իրանին։ Փոխարենը նա նշել է, որ Վաշինգտոնի հետ Հայաստանի հարաբերություններում գլխավոր առաջնահերթությունը TRIPP-ի՝ իրականացումն է, որը Հայաստանի տարածքով առաջարկվող տրանսպորտային նախագիծ է։

Նա ասել է, որ նախագիծը նախատեսված չէ Իրանի կամ Ռուսաստանի դեմ։

«Իրանը անմիջական հարևան է»,- ասել է Մկրտչյանը։ «Մենք պետք է ունենանք բնականոն հարաբերություններ, և մենք միշտ ունեցել ենք բնականոն հարաբերություններ Իրանի հետ»։

TRIPP-ի հաջող իրականացման համար, նրա խոսքով, կարևոր են Իրանի հետ խաղաղ սահմանն ու բարեկամական հարաբերությունները։ Նա հավելել է, որ Հայաստանը Թեհրանին փոխանցել է, որ նախագիծը վերաբերում է տրանսպորտին, ենթակառուցվածքներին, առևտրին ու բիզնեսին և «որևէ» առնչություն չունի ռազմական գործունեության հետ։

Ավելի լայն հարցազրույցում Մկրտչյանը Վաշինգտոնի հետ սերտացող կապերը ներկայացրել է որպես Հայաստանի՝ իր տնտեսական, անվտանգային և տեխնոլոգիական գործընկերությունները դիվերսիֆիկացնելու ջանքերի մաս։ Նրա խոսքով՝ նախատեսվող երթուղին կարող է կապել Կենտրոնական Ասիան, Հարավային Կովկասը և Եվրոպան՝ մնալով հայկական իրավազորության ներքո։