Հայաստան-Իրան սահմանին՝ Արաքս գետի վրա երկրորդ կամրջի կառուցման նախագծային աշխատանքները գրեթե ավարտված են, և առաջիկայում նախատեսվում է ընտրել կապալառու ընկերություն ու սկսել շինարարությունը։ Այս մասին նոյեմբերի 18-ին Աժ-ում կառավարության հետ հարցուպատասխանի ժամանակ հայտնել է տարածքային կառավարման և ենթակառուցվածքների նախարար Դավիթ Խուդաթյանը։
«Իրանական կողմը նախագծման աշխատանքները գրեթե ավարտում է։ Կարճ ժամանակ հետո կապալառու ընկերություն կունենանք և երկրորդ կարմրջի հարցով շինարարական գործընթաց կմեկնարկենք» ,- ասել է նախարարը։
Նախարարի խոսքով՝ կամրջի կառուցման հարցը քննարկվել է Իրանում իր վերջին աշխատանքային այցի ընթացքում։
Խոսքը Հայաստանի Մեղրիի և Իրանի Նորդուզի սահմանային անցակետերը կապող՝ Արաքս գետի վրա գործող կամրջին զուգահեռ երկրորդ ավտոմոբիլային կամուրջ կառուցելու մասին է։ Նախագծի նպատակն է մեծացնել երկու երկրների միջև տրանսպորտային հաղորդակցության թողունակությունը և դյուրացնել բեռնափոխադրումները։
Խուդաթյանը նոյեմբերի 16-17-ը աշխատանքային այցով գտնվել է Թեհրանում։
Երկրորդ կամրջի կառուցման վերաբերյալ Հայաստանն ու Իրանը պայմանավորվածություն էին ձեռք բերել դեռ 2025-ի օգոստոսի 19-ին՝ Իրանի նախագահ Մասուդ Փեզեշքիանի Հայաստան կատարած պաշտոնական այցի ընթացքում։
Այդ ժամանակ վարչապետ Նիկոլ Փաշինյանը հայտարարել էր, որ երկու երկրների միջև փոխադրումների աճող ծավալները հաշվի առնելով՝ համաձայնություն է ձեռք բերվել սահմանին երկրորդ կամուրջ կառուցելու վերաբերյալ։










