Իրանը մտահոգություններ ունի տարածաշրջանում ԱՄՆ ցանկացած ներկայության առնչությամբ, սակայն լիովին վստահում է Հայաստանին և համոզված է, որ հայկական կողմը որևէ քայլ չի ձեռնարկի ընդդեմ Իրանի անվտանգության։ Երևանում ընթացող COP17 համաժողովի շրջանակում լրագրողների հետ ճեպազրույցում հայտարարել է Իրանի արտգործնախարար Աբբաս Արաղչին:
«Փաստացի մենք մտահոգություններ ունենք տարածաշրջանում և մեր շուրջ ԱՄՆ ցանկացած ներկայության վերաբերյալ, սակայն այս հարցում մենք սերտ կապի մեջ ենք մեր հայ ընկերների հետ և վստահում ենք նրանց: Մենք գիտենք, որ նրանք ոչինչ չեն անի ընդդեմ Իրանի անվտանգության»,- ասել է Արաղչին:
Արաղչին նշել է, որ Թեհրանը շարունակում է կանոնավոր խորհրդակցությունները Հայաստանի իշխանությունների հետ երկկողմ և տարածաշրջանային օրակարգի շուրջ:
«Իմ շատ լավ ընկեր Հայաստանի արտգործնախարարը Թեհրանում էր, մենք լավ խորհրդակցություններ ունեցանք, իսկ այսօր մեր նախագահը հանդիպելու է Հայաստանի վարչապետի հետ»,- հայտնել է Իրանի արտգործնախարարը:
TRIPP-ը նախատեսված է Ադրբեջանի հիմնական տարածքի և Նախիջևանի ինքնավար հանրապետության միջև Հայաստանի տարածքով անխոչընդոտ հաղորդակցություն ապահովելու համար՝ միաժամանակ հարգելով Հայաստանի ինքնիշխանությունը, տարածքային ամբողջականությունն ու անվտանգությունը։
Հայաստանի և ԱՄՆ-ի միջև «Թրամփի ուղի հանուն միջազգային խաղաղության և բարգավաճման» (TRIPP) նախագծի վերաբերյալ ռազմավարական համագործակցության մասին շրջանակային համաձայնագիրը նախաստորագրվել է այս տարվա մայիսի 26-ին, ստորագրվել՝ հունիսի 4-ին:
Հայաստանի վարչապետ Նիկոլ Փաշինյանը և Իրանի նախագահ Մասուդ Փեզեշքիանը Թուրքմենստանում հանդիպման ընթացքում համոզմունք են հայտնել, որ երկու երկրների հարաբերություններն կբարձրանան նոր մակարդակի, իսկ առաջիկայում նախատեսվում են բարձր մակարդակի փոխայցելություններ:
Հայաստանի արտգործնախարար Արարատ Միրզոյանը հոկտեմբերի 16-ին հայտնել է, որ Իրանի հետ ռազմավարական գործընկերության մասին փաստաթուղթը գրեթե համաձայնեցված է։
Պատմություններ
