Չնայած պատժամիջոցներին՝ Ռուսաստանից Ադրբեջան դրամական փոխանցումներն աճել են

Հոդվածի թարգմանությունը՝ OC Media-ի հետ համագործակցության շրջանակում։

2026-ի առաջին կիսամյակում Ռուսաստանից Ադրբեջան դրամական փոխանցումներն աճել են 67,3 տոկոսով՝ չնայած Ռուսաստանի դեմ միջազգային պատժամիջոցներին և Ադրբեջանում Zolotaya Korona դրամական փոխանցումների համակարգի փակմանը։

Չնայած Ուկրաինայի դեմ պատերազմին և միգրացիոն քաղաքականության խստացմանը՝ Ռուսաստանը շարունակում է մնալ ադրբեջանցի աշխատանքային միգրանտների հիմնական ուղղություններից մեկը։ Միաժամանակ զգալիորեն աճել են նաև Իռլանդիայից և Վրաստանից փոխանցումները։ Ադրբեջանի Կենտրոնական բանկի տվյալներով՝ մի շարք այլ երկրներ Ադրբեջանից ուղարկվող փոխանցումները նվազել են։

Ադրբեջանի Կենտրոնական բանկի տվյալներով՝ տարվա առաջին վեց ամիսներին Ռուսաստանում գտնվող ֆիզիկական անձանցից Ադրբեջան փոխանցումները հասել են 356,6 միլիոն դոլարի։ Սա Ռուսաստանի դեմ միջազգային պատժամիջոցների սահմանումից ի վեր Ռուսաստանից Ադրբեջան դրամական փոխանցումների առաջին աճն է։

Միևնույն ժամանակ Ադրբեջանից Ռուսաստան փոխանցումները նվազել են 10 տոկոսով՝ կազմելով մոտ 20 միլիոն դոլար։

Ընդհանուր առմամբ, 2026-ի առաջին կիսամյակում արտերկրից ֆիզիկական անձանց կողմից Ադրբեջան ուղարկված դրամական փոխանցումներն աճել են 40,2 տոկոսով՝ հասնելով 748,5 միլիոն դոլարի։ Միաժամանակ Ադրբեջանից այլ երկրներ փոխանցումները նվազել են 12,7 տոկոսով՝ մինչև 207,8 միլիոն դոլար։

Արդյունքում դրամական փոխանցումների դրական հաշվեկշիռը կազմել է 540,6 միլիոն դոլար։ Միևնույն ժամանակ այս թվերը որոշ պատկերացում են տալիս Ադրբեջանի հետ կապված աշխատանքային միգրացիայի փոփոխվող միտումների մասին։

Ռուսաստանը, Թուրքիան և Իռլանդիան այն հիմնական երկրներից են, որոնց հաշվին Ադրբեջան դրամական փոխանցումների ընդհանուր աճը կազմել է 40 տոկոս։

Չնայած Ուկրաինայի դեմ պատերազմին և միգրացիոն քաղաքականության շարունակական խստացմանը՝ Ռուսաստանը մնում է ադրբեջանցիներին աշխատանք առաջարկող հիմնական երկրներից մեկը։ 2026-ի առաջին վեց ամիսներին դրամական փոխանցումների աճի ավելի քան կեսը բաժին է ընկել Ռուսաստանին։

Կտրուկ աճել են նաև Իռլանդիայից փոխանցումները։ 2025-ի առաջին կիսամյակում Ադրբեջանը Իռլանդիայից ստացել էր ընդամենը 5,8 միլիոն դոլար, իսկ 2026-ի նույն ժամանակահատվածում այդ ցուցանիշն աճել է ավելի քան յոթ անգամ՝ հասնելով 42,9 միլիոն դոլարի։

Իռլանդիայի Ձեռնարկատիրության, զբոսաշրջության և զբաղվածության նախարարության տարեկան տվյալները ևս ցույց են տալիս, որ Ադրբեջանի քաղաքացիներին աշխատանքի թույլտվություններ են տրամադրվել, սակայն պաշտոնական թվերը շարունակում են շատ փոքր մնալ․ 2025-ին աշխատանքի թույլտվություն է ստացել Ադրբեջանի հինգ քաղաքացի, իսկ 2026-ին՝ մինչ այժմ յոթը։ Թույլտվությունները հիմնականում վերաբերում են ՏՏ և ծրագրային ապահովման ոլորտներին։

Ադրբեջանի ցամաքային սահմանների փակ լինելը, որը պաշտոնապես հիմնավորվում է COVID-19 համավարակով, համընկել է նաև Ադրբեջանի և Վրաստանի միջև դրամական փոխանցումների հոսքերի փոփոխության հետ։

2026-ի առաջին կիսամյակում Վրաստանից Ադրբեջան փոխանցումներն աճել են 41 տոկոսով՝ հասնելով 25,4 միլիոն դոլարի։ Հակառակ ուղղությամբ փոխանցումները նվազել են 15,3 տոկոսով՝ մինչև 11,7 միլիոն դոլար։

Հինգ տարի առաջ պատկերը զգալիորեն տարբեր էր։ 2021-ի առաջին կիսամյակում ադրբեջանցիները Վրաստան էին ուղարկել 37,2 միլիոն դոլար։

Միևնույն ժամանակ Վրաստանից Ադրբեջան փոխանցումները 2021-ի առաջին կիսամյակի 9,6 միլիոն դոլարից 2026-ի նույն ժամանակահատվածում հասել են 25,4 միլիոն դոլարի՝ աճելով 2,6 անգամ։ Վերջին տարիներին, ըստ ամենայնի, աճել է ադրբեջանցի աշխատողների հոսքը Վրաստանի աշխատաշուկա՝ չնայած նրան, որ Վրաստանի տնտեսությունը զգալիորեն փոքր է Ադրբեջանի տնտեսությունից։