Դատարանը թույլատրել է Գագիկ Խաչատրյանին չմասնակցել նիստերին
Դատարանը սեպտեմբերի 18-ին թույլատրել է ՊԵԿ նախկին նախագահ Գագիկ Խաչատրյանին չմասնակցել դատական նիստերին։
Փաստաբան Երեմ Սարգսյանը նշել է, որ դատարանը չի բավարարել առողջական վիճակի հիմքով նիստը հետաձգելու իրենց միջնորդությունները, ինչի պատճառով պաշտպանությունը ստիպված է եղել միջնորդել Խաչատրյանի՝ նիստերին ընդհանրապես չմասնակցելու վերաբերյալ։
Նրա խոսքով՝ Խաչատրյանը ցանկանում էր մասնակցել նիստերին, սակայն՝ անհրաժեշտ բժշկական օգնություն ստանալուց և վիճակի բարելավումից հետո։
Փաստաբանը նաև հայտնել է, որ Խաչատրյանի՝ Գերմանիայից ժամանած բուժող բժշկին թույլ չեն տվել այցելել նրան քրեակատարողական հիմնարկում։ Նրա խոսքով՝ բժիշկը ներկայացրել էր անհրաժեշտ փաստաթղթերը և ցանկանում էր զննել Խաչատրյանին։
Սարգսյանը պնդել է, որ Խաչատրյանը, բացի ցավազրկողներից, այլ բուժում չի ստանում։ Նրա խոսքով՝ 2025 և 2026 թվականներին կատարված փորձաքննություններով արձանագրվել է վիրահատության անհրաժեշտություն, ինչը, պաշտպանական թիմի պնդմամբ, Հայաստանում հնարավոր չէ իրականացնել։
Գագիկ Խաչատրյանը սեպտեմբերի 1-ին ձերբակալվել, այնուհետև կալանավորվել էր առանձնապես խոշոր չափերով կաշառք ստանալու և փողերի լվացման մեղադրանքով։
Ձերբակալության օրը դիմակավորված ԱԱԾ ծառայողները նրան պատգարակով էին դուրս բերել, ապա շտապօգնության մեքենայով տեղափոխել ՔԿ, որտեղ էլ միջնորդություն էր ներկայացվել՝ նրան կալանավորելու վերաբերյալ: Խաչատրյանը նիստերին մասնակցում էր պառկած վիճակում, քանի որ ունի առողջական խնդիրներ։
Պատմություններ
