Թուրքիայից վտանգ չկա, իսկ ռազմաբազայի հարցով պատրաստ ենք յուրաքանչյուր ելքի. Ալեն Սիմոնյան

Հայաստանում ռուսական ռազմաբազայի վերաբերյալ քննարկումների թեման օրակարգ է բերել ռուսական կողմը, իսկ հայկական կողմը հայտարարել է, որ պատրաստ է այդ քննարկումների յուրաքանչյուր ելքին։ Այս մասին կառավարությունում ճեպազրույցի ժամանակ ասել էԱնվտանգության խորհրդի քարտուղար Ալեն Սիմոնյանը։

«Դա քաղաքական որոշում է, քաղաքական քննարկման թեմա է, որը բացել է ռուսական կողմը։ Մենք նման հարց չենք քննարկում, չենք քննարկել, դա իրենց օրակարգ բերված հարցն է, որի յուրաքանչյուր ելք մեր համար ընդունելի է»,- նշել է Սիմոնյանը։

Անդրադառնալավ հարցին, որ ռուսական ռազմաբազայի հեռացման դեպքում կուժեղանա Թուրքիայից եկող վտանգը, Սիմոնյանը նշել է, որ իր գնահատմամբ այդ սպառնալիքի գոյությունը զրո է։

Ես չեմ տեսնում Թուրքիայից վտանգ Հայաստանի Հանրապետության ինքնիշխանությանը։ Օգոստոսի 8-ից սկսած ընդհանրապես որևիցե վտանգ չեմ տեսնում և չեմ ուզում կապել այդ ռազմաբազան Թուրքիայի հետ վտանգով։ Օգոստոսի 8-ից հետո այդ սպառնալիքի գոյությունն իմ գնահատմամբ զրո է»,- նշել է ԱԽ քարտուղարը։

Սեպտեմբերի 1-ին ՌԴ նախագահ Վլադիմիր Պուտինը Բիշքեկում ասուլիսի ժամանակ հայտարարել էր. «Եթե Հայաստանը համարում է, որ ռուսաստանյան ռազմաբազան իրեն պետք չէ, մենք հենց վաղը կհեռանանք։ Հայաստանը պատրա՞ստ է դրան։ Խնդրեմ, մենք ոչ մեկին ոչինչ չենք պարտադրելու»։

Վարչապետ Նիկոլ Փաշինյանն ի պատասխան հայտարարել է, որ Հայաստանը չի առարկի, եթե Ռուսաստանը որոշի դուրս բերել հանրապետության տարածքում տեղակայված 102-րդ ռազմաբազան։ 

Հայաստանի տարածքում տեղակայված ռուսական 102-րդ ռազմական բազան գործում է միջպետական պայմանագրերի հիման վրա և նախատեսված է հանրապետության արտաքին անվտանգային սպառնալիքները զսպելու համար։