«Պետք է ուսումնասիրել»․ Կոմունիստական կուսակցության առաջնորդը Պուտինին խնդրել է ստուգել Հյուսիսային Կովկասում ընտրությունների արդյունքները

Հոդվածի թարգմանությունը՝ OC Media-ի հետ համագործակցության շրջանակում։

Կոմունիստական կուսակցության առաջնորդ Գենադի Զյուգանովը Ռուսաստանի նախագահ Վլադիմիր Պուտինին խնդրել է ստուգել մի շարք շրջաններում, այդ թվում՝ Դաղստանում և Ինգուշեթիայում, ընտրությունների արդյունքները։ Պաշտոնական տվյալներով՝ Պետդումայի՝ Ռուսաստանի խորհրդարանի ստորին պալատի ընտրություններում Կոմունիստական կուսակցությունը Դաղստանում ստացել է ձայների 2,45 տոկոսը, իսկ Ինգուշեթիայում՝ 2,98 տոկոսը։ Զյուգանովը կասկած է հայտնել այս թվերի ճշգրտության վերաբերյալ և առաջարկել հատուկ հանձնաժողով ստեղծել։

«Ես Կովկասում աշխատել եմ 10 տարի, Կովկասը գիտեմ այնքան լավ, որքան իմ հարազատ շրջանը՝ Օրյոլը։ Դաղստանում ժամանակին ստանում էի ձայների մինչև 70-80 տոկոսը։ Դերբենդից մինչև Բույնակսկ ոտքով եմ անցել։ Չեմ հասկանում՝ ինչու են այնտեղ մեզ համար 2,4 տոկոս գրել։ Ուստի սա պետք է ուսումնասիրել։ Եկեք խմբակցությունների հետ միասին հանձնաժողով ստեղծենք և քննենք հարցը, որովհետև այնտեղ նման տրամադրություններ չկան և երբեք չեն էլ լինի»,- սեպտեմբերի 28-ին Պուտինի հետ հանդիպմանը ասել է Զյուգանովը։

Պուտինը համաձայնել է, որ արդյունքները պետք է ստուգվեն։

«Ինչ վերաբերում է առանձին շրջաններում ընտրությունների արդյունքները ստուգելուն, համաձայն եմ՝ ամեն ինչ պետք է ստուգել»,- ասել է Ռուսաստանի նախագահը։

Նա նաև ասել է, որ Կենտրոնական ընտրական հանձնաժողովի (ԿԸՀ) ղեկավար Էլլա Պամֆիլովան իրեն հայտնել է, որ Կոմունիստական կուսակցությունը պաշտոնական բողոքներ չի ներկայացրել։ Պուտինը հավելել է, որ եթե կասկածներ կան, արդյունքները կարելի է ուսումնասիրել հատուկ ստեղծված հանձնաժողովի կամ այլ մեխանիզմների միջոցով։

Զյուգանովը հրապարակայնորեն Դաղստանում կամ Ինգուշեթիայում կոնկրետ խախտումներ չի նշել։ Սակայն սեպտեմբերի 25-ին ԿԸՀ-ում ելույթի ժամանակ նա Հյուսիսային Կովկասում գրանցված արդյունքներն անվանել է «բոլոր սահմաններից դուրս» և ասել, որ դրանք չեն համապատասխանում ընտրությունների նկատմամբ քաղաքացիների վստահությունն ապահովելու՝ նախագահի հռչակած նպատակին։

Դաղստանի մասին խոսելով՝ նա նշել է, որ արձանագրություններում գրված արդյունքը «ոչ մի կերպ չէր կարող» իրական լինել՝ նկատի ունենալով Կոմունիստական կուսակցության 2,45 տոկոսը։ Ինգուշեթիայի վերաբերյալ նա ասել է․ «Ինգուշեթիայում ավելի վատ է։ Մանրամասների մեջ չեմ մտնի»։

Դաղստանի և Ինգուշեթիայի ընտրական հանձնաժողովները ընտրությունները վավեր են ճանաչել։ Դաղստանի ընտրական հանձնաժողովը հայտարարել է, որ հնարավոր խախտումների վերաբերյալ որևէ բողոք չի ստացել։

Դաղստանի ընտրական հանձնաժողովի վերջնական տվյալներով՝ սեպտեմբերի 18-20-ին Պետդումայի ընտրություններին մասնակցությունը կազմել է 91,69 տոկոս։ «Եդինայա Ռոսիա»-ն ստացել է ձայների 92,22 տոկոսը, «Արդար Ռուսաստան»-ը՝ 2,69 տոկոսը, Կոմունիստական կուսակցությունը՝ 2,45 տոկոսը, իսկ Լիբերալ-դեմոկրատական կուսակցությունը՝ 1,45 տոկոսը։

Միաժամանակ Կոմունիստական կուսակցությունը զգալիորեն ավելի լավ արդյունք է գրանցել Դաղստանի խորհրդարանի ընտրություններում՝ ստանալով 10,99 տոկոս։ «Եդինայա Ռոսիա»-ն ստացել է 74 տոկոս, իսկ «Արդար Ռուսաստան»-ը՝ 11,99 տոկոս։ Կոմունիստական կուսակցությունը տարածաշրջանային խորհրդարանի 90 մանդատից ստացել է 10-ը։

2021-ի Պետդումայի ընտրություններում Կոմունիստական կուսակցությունը Դաղստանում ավելի մեծ թվով ձայներ էր ստացել, քան 2026-ին։ Տարածաշրջանային ընտրական հանձնաժողովի տվյալներով՝ կուսակցությունը ստացել էր 6,2 տոկոս, իսկ «Եդինայա Ռոսիա»-ն՝ 81 տոկոս։

«Դաղստանի դիտորդներ» շարժման ներկայացուցիչները հայտնել են պաշտոնական մասնակցության ցուցանիշների և առանձին ընտրատեղամասերում իրենց գնահատականների միջև էական տարբերությունների մասին՝ իշխանություններին մեղադրելով մասնակցության թվերն ուռճացնելու և արդյունքները մանիպուլացնելու մեջ։

2023-ին Դաղստանի համայնքային ընտրություններում Կոմունիստական կուսակցության արդյունքները նույնպես զգալիորեն տարբերվել էին տարբեր շրջաններում։ Օրինակ՝ Իզբերբաշում կուսակցությունը ստացել էր 23,7 տոկոս, Խասավյուրտում՝ 14,5 տոկոս, Կիզիլյուրտում՝ 9,1 տոկոս, իսկ Դերբենդում՝ 8 տոկոս։

Ինգուշեթիայում տարբերությունն ավելի ընդգծված է եղել։ Տարածաշրջանային ընտրական հանձնաժողովի տվյալներով՝ Պետդումայի ընտրություններում «Եդինայա Ռոսիա»-ն ստացել է ձայների 90,44 տոկոսը, Կոմունիստական կուսակցությունը՝ 2,98 տոկոսը, իսկ «Նոր մարդիկ»-ը՝ 2,81 տոկոսը։ Մասնակցությունը գերազանցել է 91 տոկոսը։

Ինգուշեթիայի թիվ 16 միամանդատ ընտրատարածքում Կոմունիստական կուսակցության թեկնածու Խամզատ Կոդոևը ստացել է 10,88 տոկոս և զբաղեցրել երկրորդ տեղը՝ զիջելով «Եդինայա Ռոսիա»-ի թեկնածու Մուսլիմ Տատրիևին, որը ստացել է 81,99 տոկոս։

2026-ի սեպտեմբերին Ինգուշեթիայի խորհրդարանի ընտրություններում Կոմունիստական կուսակցությունը ստացել է 2,52 տոկոս և որևէ մանդատ չի ստացել։ «Եդինայա Ռոսիա»-ն ստացել է 80,84 տոկոս, «Արդար Ռուսաստան»-ը՝ 5,49 տոկոս, Լիբերալ-դեմոկրատական կուսակցությունը՝ 5,24 տոկոս, իսկ «Նոր մարդիկ»-ը՝ 5,05 տոկոս։

Համեմատության համար՝ 2021-ի Ինգուշեթիայի խորհրդարանի ընտրություններում Կոմունիստական կուսակցությունը ստացել էր 4,16 տոկոս և նույնպես չէր հաղթահարել 5 տոկոսի շեմը։ Խորհրդարանում տեղեր էին ստացել «Եդինայա Ռոսիա»-ն, «Արդար Ռուսաստան»-ը և Լիբերալ-դեմոկրատական կուսակցությունը։

Միաժամանակ Կոմունիստական կուսակցության Ինգուշեթիայի բաժանմունքը պնդում է, որ 2021-ին ղեկավարության փոփոխությունից հետո կուսակցությանը միացել է ավելի քան 700 մարդ, իսկ հանրապետության բոլոր քաղաքներում և շրջաններում ստեղծվել են սկզբնական կուսակցական կազմակերպություններ։