Հոդվածի թարգմանությունը՝ OC Media-ի հետ համագործակցության շրջանակում։
Հյուսիսային Օսիայից Ելենա Ալբեգովան դատապարտվել է երեք տարվա ազատազրկման՝ 2021-ին հանգուցյալ ռուս ընդդիմադիր գործիչ Ալեքսեյ Նավալնիի Կոռուպցիայի դեմ պայքարի հիմնադրամին (FBK) 1000 ռուբլի (11 դոլար) նվիրաբերելու համար «ծայրահեղական գործունեության ֆինանսավորման» մեղադրանքով։ Անկախ Mediazona լրատվամիջոցի հաղորդմամբ՝ սեպտեմբերի 7-ին դատարանում Ալբեգովան ընդունել է մեղքը և զղջում հայտնել։
Ալբեգովան ասել է, որ «որոշ ժամանակ [FBK-ի] գործունեությանը չի հետևել»՝ հավելելով, որ նույնիսկ վստահ չէ՝ հիմնադրամը դեռ գոյություն ունի Ռուսաստանում։
FBK-ն 2021-ին Ռուսաստանում ճանաչվել է ծայրահեղական կազմակերպություն և արգելվել։ Նույն տարվա հունիսին Մոսկվայի քաղաքային դատարանը բավարարել է դատախազության պահանջը՝ FBK-ն և դրա հետ կապված կազմակերպությունները ծայրահեղական ճանաչելու վերաբերյալ։ Դրանից հետո հիմնադրամին նվիրատվությունները հիմք դարձան ծայրահեղական գործունեության ֆինանսավորման մասին հոդվածով քրեական գործեր հարուցելու համար։
Ալբեգովայի գործը, ըստ ամենայնի, ընդամենը երկրորդ դեպքն է, երբ FBK-ին նվիրատվության համար ազատազրկման դատավճիռ է կայացվել։ Հիմնադրամին նվիրատվություն կատարած մարդկանց մեծ մասը միայն տուգանվել է։
Օգոստոսին Դաղստանի Մախաչկալա քաղաքից մի կին, որի անունը չի հրապարակվել, 500 հազար ռուբլու (6000 դոլար) տուգանքի էր դատապարտվել՝ FBK-ին 500 ռուբլի (6 դոլար) փոխանցելու համար։ Պարզ չէ, թե ինչու է Ալբեգովան ազատազրկման դատապարտվել, իսկ Մախաչկալայի բնակչուհին միայն տուգանվել, քանի որ գործերի մյուս մանրամասները գրեթե նույնական են։
Տե՛ս նաև՝ Մախաչկալայի բնակչուհին Նավալնիի հիմնադրամին 6 դոլար նվիրաբերելու համար տուգանվել է 6000 դոլարով
Պատմություններ
