Իլհամ Ալիևը «Նոր Ադրբեջան»-ը կղեկավարի առանց ժամկետային սահմանափակման

«Նոր Ադրբեջան» կուսակցության նոր կանոնադրությամբ հանվում է կուսակցության նախագահի պաշտոնավարման հնգամյա սահմանափակումը։ Փոփոխությունների համաձայն՝ Իլհամ Ալիևի՝ որպես կուսակցության նախագահի պաշտոնավարման ժամկետն այլևս սահմանափակված չի լինի։

Այս մասին հոկտեմբերի 2-ին կուսակցության VIII համագումարում կանոնադրության փոփոխությունների քննարկման ժամանակ հայտարարել է Վերահսկիչ-վերստուգիչ հանձնաժողովի անդամ, պատգամավոր Նիզամի Սաֆարովը։

Նրա խոսքով՝ գործող կանոնադրությամբ կուսակցության նախագահի լիազորությունների ժամկետը հինգ տարի էր, որից հետո նախագահը կարող էր համագումարի կողմից վերընտրվել։

Կանոնադրության փոփոխությունները համագումարում դրվել են քվեարկության և միաձայն հաստատվել։

Իլհամ Ալիևը «Նոր Ադրբեջան» կուսակցությունը ղեկավարում է 2005-ից։ Մինչ այդ՝ կուսակցության հիմնադրումից՝ 1992-ից, այն ղեկավարում էր հիմնադիր Հեյդար Ալիևը։