Հայաստանի արտաքին գործերի նախարար Արարատ Միրզոյանը Թեհրանում հանդիպել է Իրանի արտգործնախարար Սեյեդ Աբբաս Արաղչիի հետ․ կողմերը քննարկել են երկկողմ հարաբերությունների առանցքային հարցեր, ինչպես նաև մտքեր փոխանակել տարածաշրջանային ու միջազգային զարգացումների շուրջ։ Այս մասին հայտնում է Irna գործակալությունը։
Իրանի ԱԳՆ պաշտոնական ներկայացուցիչ Էսմայիլ Բաղաիի փոխանցմամբ՝ Միրզոյանի այցն իրականացվում է երկու երկրների միջև ընթացող պարբերական խորհրդակցությունների շրջանակում, որոնք նպատակաուղղված են երկկողմ հարաբերությունների ընդլայնմանն ու տարածաշրջանային խաղաղության և անվտանգության ամրապնդմանը։
Նա հավելել է, որ իրանցի պաշտոնյաների հետ հանդիպումների ընթացքում նախատեսվում է քննարկել Հարավային Կովկասում տարածաշրջանային համագործակցությանն առնչվող հարցեր։
Հայաստանի ԱԳ նախարարությունից հայտնում են, որ Թեհրանում ընթանում է Արարատ Միրզոյանի և Սեյեդ Աբբաս Արաղչիի հանդիպումն ընդլայնված կազմով՝ երկու երկրների պատվիրակությունների մասնակցությամբ:
Պատմություններ
