Սյունիքի մարզի Շաքի համայնքում ադրբեջանցի զինծառայողի հայտնվելու դեպքը վարչապետ Նիկոլ Փաշինյանը որակել է որպես կրիմինալ միջադեպ։
«Հայաստանում, ցավոք, ամեն օր լինում են այդպիսի կրիմինալ միջադեպեր»,- ասել է վարչապետը։
Ազգային ժողովում Կառավարության հետ հարցուպատասխանի ընթացքում Փաշինյանը համոզմունք է հայտնել, որ եթե ոստիկանության գալուն սպասեին, բացարձակապես ոչ մի բան մեծ հավանականությամբ տեղի չէր ունենա։ Ըստ Փաշինյանի՝ ընդդիմության առաջարկած մոտեցումները նման իրավիճակներում կհանգեցնեին լուրջ ռազմական էսկալացիայի։
«Եթե հիմա դուք լինեիք իշխանություն, հիմա արդեն սկսված կլիներ Հայաստանի Հանրապետությունում մասնակի կամ ամբողջական զորահավաքը» , - դիմելով խորհրդարանական ընդդիմությանը՝ պնդել է վարչապետը։
Նիկոլ Փաշինյանը ներկայացրել է դեպքի մանրամասները՝ նշելով, որ այն տանը, որտեղ մտել է ադրբեջանցի զինծառայողը, բնակիչները մի քանի օր բացակայել են։ Երեխաները, տանը օտար մարդ տեսնելով, զանգահարել են մորը, որից հետո վերջինս ահազանգել է ոստիկանություն։ Վարչապետի խոսքով՝ մայրը տեղ է հասել ավելի շուտ, քան ոստիկանությունը։
Փաշինյանի փաստարկմամբ՝ աշխարհում չկա որևէ սահման, որտեղ ապօրինի հատման դեպքեր տեղի չունենան, իսկ պաշտպանական համակարգի նպատակն է հայտնաբերել ու կասեցնել ռազմական օպերացիաները։ Փաշինյանը շեշտել է, որ ընդդիմության իշխանության պարագայում Շաքիի միջադեպի պատճառով երկրում ռազմական դրություն կհայտարարվեր, բանակը կբերվեր առաջին մարտական վիճակի, և սահմանային տարածքը հրետանային ու օդային հարվածների կենթարկվեր։
Սեպտեմբերի 29-ին Ադրբեջանի զորամասից ինքնակամ հեռացած զինծառայող Նասիմի Մուսաևը հայտնվել է Հայաստանի տարածքում։ Հոկտեմբերի 1-ին նա ապօրինի մուտք է գործել Սյունիքի Շաքի բնակավայրի տուն և կրակոցներ արձակել՝ վիրավորելով կնոջն ու վնասվածքներ պատճառելով նրա երկու երեխաներին։ Նա ձերբակալվել է և երկու ամսով կալանավորվել։
Պատմություններ
