Արթուր Դանիելյանի նկատմամբ այս պահին հանրային քրեական հետապնդում չկա․ ՔԿ

Արթուր Դանիելյանի նկատմամբ հանրային քրեական հետապնդում այս պահին չկա։ Այս մասին ՍիվիլՆեթին հայտնեց Քննչական կոմիտեի մամուլի խոսնակ Կիմա Ավդալյանը։

Փաստաբան Տիգրան Աթանեսյանը հայտնել է, որ Դանիելյանը շարունակում է գտնվել Երևանի քննչական վարչության շենքում։

«Մինչ այս պահը Արթուր Դանիելյանը գտնվում է Երևանի քննչական վարչության շենքում, սպասվում են նոր վարութային գործողություններ: Դատարան տեղափոխելու վերաբերյալ այս պահին տեղեկություններ չկան»,- գրել է Աթանեսյանը։

Այսօր հայտնի դարձավ, որ «Ադեկվատ» կուսակցության հիմնադիր Արթուր Դանիելյանը ձերբակալվել է։ Դանիելյանը պարբերաբար քննադատական գրառումներ է անում իշխանությունների հասցեին։

Ավելի վաղ Քննչական կոմիտեից հայտնել էին, որ նախաձեռնված քրեական վարույթի շրջանակում է ձերբակալվել Դանիելյանը։ Վարույթը վերաբերվում է տեղեկատվական կամ հաղորդակցական տեխնոլոգիաներն օգտագործելով խուլիգանություն կատարելու համար։

Իրավապահները չեն մանրամասնում, թե կոնկրետ որ գրառման կամ դրա որ հատվածի համար է ձերբակալվել Արթուր Դանիելյանը։

Դանիելյանն առավոտյան Ֆեյսբուքում հայտնել էր, որ իրեն կանչել են Քննչական կոմիտե և պատրաստվում են մեղադրանք առաջադրել։ «Չգիտեմ՝ ինչի մասին ա, էական էլ չի։ Եթե քննիչի մոտից դուրս գամ, ուղիղ եթերով կմեկնաբանեմ այս ամենը»,- գրել էր նա։

Նույն գրառման մեջ Դանիելյանը պնդել էր, որ վերջին երեք օրերին ադրբեջանցիները տարածում են իր հին ելույթների թարգմանությունները և սպառնալիքներ հնչեցնում իր հասցեին՝ քրեական վարույթը կապելով այդ հանգամանքի հետ։

Ձերբակալությունից մոտ 12 ժամ առաջ Արթուր Դանիելյանը «Ֆեյսբուք»-ում «վիժվածք» էր անվանել վարչապետ Նիկոլ Փաշինյանին՝ մեջբերելով Հայաստանում կալանավորված ադրբեջանցի զինծառայողի և հայ գերիների հնարավոր փոխանակման վերաբերյալ նրա մեկնաբանությունը։

Արթուր Դանիելյանը նախկինում ևս ձերբակալվել է։ 2020-ին նա ձերբակալվել էր Ազգային ժողովի այն ժամանակվա փոխնախագահ Ալեն Սիմոնյանի հետ ծեծկռտուքից հետո։

Սեպտեմբերի 29-ին Ադրբեջանի զորամասից ինքնակամ հեռացած զինծառայող Նասիմի Մուսաևը հայտնվել է Հայաստանի տարածքում։ Հոկտեմբերի 1-ին նա ապօրինի մուտք է գործել Սյունիքի Շաքի բնակավայրի տուն և կրակոցներ արձակել՝ վիրավորելով կնոջն ու վնասվածքներ պատճառելով նրա երկու երեխաներին։ Նա ձերբակալվել է և երկու ամսով կալանավորվել։