Հոդվածի թարգմանությունը՝ OC Media-ի հետ համագործակցության շրջանակում։
Իսրայելի նախագահ Իսահակ Հերցոգը հոկտեմբերի 14-ին Բաքու մեկնելիս շրջանցել է Թուրքիայի օդային տարածքն օգտագործելու արգելքը՝ թռչելով Azerbaijan Airlines-ի առևտրային չվերթով, ինչը դժգոհություն է առաջացրել Անկարայում։ Ավելի ուշ թուրք պաշտոնյաները հայտարարել են, որ տեղյակ չեն եղել, որ Հերցոգն այդ չվերթում է եղել։
2024-ին Թուրքիան արդեն մերժել էր Հերցոգին իր օդային տարածքով Ադրբեջան մեկնելու թույլտվությունը, ինչի հետևանքով նա չեղարկել էր Բաքվում անցկացվող COP29 համաժողովին մասնակցելու իր ծրագրերը։
Լուրը տարածվել է Ադրբեջանի և Թուրքիայի միջև սրված լարվածության ֆոնին, որը, ըստ ամենայնի, սկսվել է Ադրբեջանի դպրոցներում հիջաբի վիճահարույց արգելքից հետո։ Միաժամանակ Անկարան վաղուց դժգոհ է Իսրայելի հետ Ադրբեջանի սերտ հարաբերություններից, իսկ թուրք որոշ մեկնաբաններ այս երկու հարցերը կապում են իրար՝ պնդելով, որ Բաքվի՝ իսլամի նկատմամբ ենթադրյալ անհարգալից վերաբերմունքը մասամբ կարելի է բացատրել Իսրայելի հետ նրա բարեկամությամբ։
Հոկտեմբերի 16-ին ադրբեջանական հայտնի իշխանամետ APA լրատվամիջոցը հոդված է հրապարակել՝ քննադատելով չվերթի շուրջ թուրքական «աղմուկը» և նշելով, որ «հարցն իրականում բավական պարզ է»։
«Իսրայելի նախագահի՝ Ադրբեջան այցի համար որևէ հատուկ ինքնաթիռ կամ արտասովոր չվերթ չի կազմակերպվել։ Նա Ադրբեջան է ժամանել որպես սովորական առևտրային չվերթի ուղևոր»,- գրել է APA-ն։
«Սակայն Թուրքիայում նրանք, ովքեր ամեն անգամ Ադրբեջանի առնչությամբ պատրվակ են փնտրում և այն «մանրակրկիտ զննում», այս հարցն էլ են մանիպուլյացիայի թեմա դարձրել»,- շարունակել է APA-ն։
Ադրբեջանական այլ լրատվամիջոցներ նույնպես անդրադարձել են չվերթին՝ պնդելով, որ Թուրքիային Հերցոգի՝ իր օդային տարածքով անցնելու մասին տեղեկացնելու անհրաժեշտություն չի եղել, քանի որ նա օգտվել է առևտրային չվերթից։
Հերցոգը Ադրբեջանում էր՝ մասնակցելու Ասիայում փոխգործակցության և վստահության միջոցների խորհրդաժողովին։ Այցի ընթացքում նա նաև առանձնազրույց է ունեցել Իլհամ Ալիևի հետ։
Գագաթնաժողովի ընթացքում Հերցոգը ելույթ է ունեցել, ինչից հետո Թուրքիայի արտգործնախարար Հաքան Ֆիդանը և մյուսները լքել են դահլիճը։ Միջադեպի տեսանյութերը լայնորեն տարածվել են սոցիալական ցանցերում։
Պատմություններ
