Զելենսկին մտադիր է առաջադրվել, եթե ընտրություններն անցկացվեն պատերազմի ընթացքում

Ուկրաինայի նախագահ Վոլոդիմիր Զելենսկին հայտարարել է, որ պատերազմի ընթացքում նախագահական ընտրություններ անցկացվելու դեպքում ինքը կառաջադրվի, քանի որ իր պարտքն է համարում Ուկրաինան պաշտպանելը մինչև ռազմական գործողությունների ավարտը։

NBC News-ին տված հարցազրույցում Զելենսկին նշել է, որ ընտրություններ անցկացնելու համար պատրաստ է լուծումներ գտնել, եթե Ռուսաստանը համաձայնի 60-օրյա հրադադարի։ Նա պարզաբանել է, որ թեև գործող օրենսդրությունը պատերազմի ավարտից հետո նախապատրաստման համար պահանջում է առնվազն վեց ամիս, հարցը վերաբերում է ոչ միայն օրենքին, այլև անվտանգության միջոցառումներին։

Ուկրաինայի նախագահի խոսքով՝ եթե ԱՄՆ-ն պնդում է ընտրությունների անցկացումը, ապա անհրաժեշտ է առնվազն 60-օրյա հրադադար, որպեսզի հնարավոր լինի փոփոխություններ կատարել օրենսդրության մեջ և պատրաստել անվտանգության ենթակառուցվածքները։ Նա ընդգծել է նաև զինվորականներին քվեարկելու հնարավորություն տալու անհրաժեշտությունը, քանի որ նրանք են պաշտպանում երկիրը։

Զելենսկին հերքել է ենթադրություններն այն մասին, թե ինքը չի ցանկանում ընտրություններ անցկացնել, և նշել է, որ երկիրը ղեկավարողի վերաբերյալ որոշումը պետք է կայացնեն ուկրաինացիները։