Երևանի Գաջեգործների փողոցում՝ «Աղի լճի» մոտակայքում, կոյուղագծի անցկացման աշխատանքների ընթացքում հողազանգվածի փլուզման հետևանքով մեկ մարդ մահացել է, ևս մեկը՝ հոսպիտալացվել։ Այս մասին հայտնում է ՆԳՆ փրկարար ծառայությունը։
Ըստ հաղորդագրության՝ հոկտեմբերի 29-ին՝ ժամը 12։45-ին, ՆԳՆ 112 օպերատիվ կառավարման կենտրոն ահազանգ է ստացվել, որ կոյուղու համար փորման աշխատանքներ իրականացնելիս աշխատակիցները մնացել են հողազանգվածի տակ։
Դեպքի վայր են մեկնել հրշեջ-փրկարարական երկու մարտական հաշվարկ, ինչպես նաև հատուկ նշանակության փրկարարական, բժշկական ապահովման և այլ ստորաբաժանումների խմբեր։
Փրկարարները հողազանգվածի տակից դուրս են բերել քաղաքացիներից մեկին և մոտեցրել շտապօգնության ավտոմեքենային։ Տուժածը տեղափոխվել է հիվանդանոց։ Ժամը 14։47-ի սահմաններում հատուկ տեխնիկայի միջոցով դուրս է բերվել մյուս քաղաքացու դին։
Երևանի քաղաքապետի մամուլի քարտուղար Ջուլիետա Ազարյանը հայտնել է, որ հոսպիտալացված քաղաքացու կյանքին վտանգ չի սպառնում։
Պատմություններ
