Հայաստանը կարող է 2027 կամ 2028 թվականին Եվրամիությանն անդամակցելու պաշտոնական հայտ ներկայացնել։ Այս մասին վարչապետ Նիկոլ Փաշինյանը հայտարարել է նոյեմբերի 3-ին Բրյուսելում՝ Euronews հեռուստաընկերության կազմակերպած «ԵՄ ընդլայնման գագաթնաժողով 2026»-ի շրջանակում։
«Հաջորդ տարին կարող է իրատեսական լինել։ 2028 թվականը նույնպես կարող է իրատեսական լինել։ Մենք սկսել ենք գործընթաց, որը մեզ կհանգեցնի Եվրամիությանն անդամակցելու պաշտոնական հայտ ներկայացնելու վերաբերյալ վերջնական որոշման կայացմանը»,- ասել է Փաշինյանը։
Վարչապետը ԵՄ անդամակցությունը ներկայացրել է որպես Հայաստանի ժողովրդավարության պաշտպանությանն ուղղված ռազմավարական ընտրություն։
«Մեր ժողովրդի համար ժողովրդավարությունը հանգամանքներով պայմանավորված հարց չէ։ Դա ռազմավարական ընտրություն է։ Եվրոպական միությունը Հայաստանի Հանրապետության հիմնական գործընկերներից մեկն է եղել ժողովրդավարական բարեփոխումների օրակարգի իրականացման գործում»,- նշել է նա։
Փաշինյանի խոսքով՝ կառավարության նպատակն է Հայաստանի և նրա քաղաքացիների համար այլընտրանք ստեղծել։
«Մեր առաջնային նպատակն է այլընտրանք ստեղծել Հայաստանի ժողովրդի և Հայաստանի Հանրապետության համար, քանի որ ավանդաբար մեր հասարակության և գուցե նաև մեր հարևանների շրջանում ընկալում է եղել, որ Հայաստանը այլընտրանք չունի»,- ասել է Փաշինյանը։
Անդրադառնալով Ռուսաստանի հետ հարաբերություններին՝ Փաշինյանը նշել է, որ Հայաստանը ձգտում է բազմազանեցնել իր քաղաքական և տնտեսական կապերը։
Euronews-ի հարցին՝ Ռուսաստանի նախկին նախագահ Դմիտրի Մեդվեդևի այն հայտարարության վերաբերյալ, թե Հայաստանը կարող է դառնալ «հաջորդ Ուկրաինան», Փաշինյանը պատասխանել է, որ Հայաստանի նպատակը սեփական անկախության ամրապնդումն է։
«Մեր նպատակն է նոր մակարդակի բարձրացնել, զարգացնել մեր անկախությունը։ Եվ դա օրինական նպատակ է։ Ոչ ոք չի կարող սահմանափակել Հայաստանի ձգտումը՝ դառնալու ավելի անկախ և ավելի ինտեգրված երկիր»,- հայտարարել է նա։
Պատմություններ
