Բելգիայում նոյեմբերի 23-ին նախատեսված համազգային գործադուլի պատճառով սպասվում են ավիաչվերթների զանգվածային չեղարկումներ և հասարակական տրանսպորտի աշխատանքի խափանումներ։
Ինչպես հաղորդում է AFP-ն, Բելգիայի օդային երթևեկության վերահսկման Skeyes ընկերությունը հայտարարել է, որ գործադուլի պատճառով նոյեմբերի 23-ին՝ ժամը 07։00-ից մինչև 21։00-ն, չի կարող ապահովել բնականոն օդային հաղորդակցությունը։ Բրյուսելի օդանավակայանը նախատեսում է չեղարկել ժամանող և մեկնող չվերթների մեծ մասը։
Գործադուլը կազմակերպել են երկրի խոշոր արհմիությունները՝ ի նշան բողոքի վարչապետ Բարտ Դե Վևերի կառավարության սոցիալական ծախսերի կրճատման և տնտեսական բարեփոխումների դեմ։
Արհմիությունների հայտարարությամբ՝ բնակարանների վարձակալության, էներգակիրների, տրանսպորտի և սննդամթերքի գների աճի պայմաններում ընտանիքների համար գնալով դժվարանում է հոգալ ամենօրյա ծախսերը։
Նոյեմբերի 23-ին հազարավոր ցուցարարներ կհավաքվեն Բրյուսելում։ Բողոքի ակցիան կմեկնարկի ժամը 10։00-ին՝ քաղաքի հյուսիսային երկաթուղային կայարանի մոտ, որից հետո ցուցարարները երթով կշարժվեն դեպի հարավային կայարան։
Ինչպես գրում է The Brussels Times-ը, գործադուլի հետևանքով սպասվում են ավտոբուսների, տրամվայների և մետրոյի աշխատանքի լուրջ խափանումներ։ Ֆլանդրիայի և Վալոնիայի հասարակական տրանսպորտի օպերատորները ևս զգուշացրել են հնարավոր սահմանափակումների մասին։
Բելգիայի երկաթուղային SNCB-NMBS ընկերությունը նոյեմբերի 20-ի դրությամբ հայտնել էր, որ գործադուլի մասին ծանուցում չի ստացել, ուստի նախատեսում է երկաթուղային հաղորդակցությունն իրականացնել բնականոն ռեժիմով։ Բրյուսելի մի շարք համայնքներում կարող է խաթարվել նաև աղբահանությունը։
Սա Բելգիայում կառավարության սոցիալ-տնտեսական բարեփոխումների դեմ կազմակերպվող գործադուլների հերթական փուլն է։ Արհմիությունների դժգոհությունը վերաբերում է նաև կենսաթոշակային համակարգի փոփոխություններին, աշխատավարձերին և աշխատանքային պայմաններին։












