Գլխավոր Լրահոս

Հարավային Կորեայում կրթության նախարարը հրաժարական է տվել AI-ի միջոցով խաբեության սկանդալի ֆոնին

Նոյեմբերի 21-ին Սեուլում ուսանողները դուրս են գալիս Սունգկյունկվան համալսարանի ընդունելության քննությունից։

Նոյեմբերի 21-ին Սեուլում ուսանողները դուրս են գալիս Սունգկյունկվան համալսարանի ընդունելության քննությունից։

Լուսանկարը՝ Jung Yeon-je / AFP

Հարավային Կորեայի կրթության նախարար Չոյ Կյո Ջինը նոյեմբերի 22-ին հրաժարական է տվել արհեստական բանականության (AI) օգնությամբ քննություններում խաբեության շուրջ սկանդալի պատճառով։ Երկրի նախագահ Լի Ջե Մյոնը ընդունել է նրա հրաժարականը, հաղորդում է AFP-ն։

Սկանդալը սկսվել էր այն բանից հետո, երբ հարկային հաշվապահների համազգային քննության ամենաբարձր միավորը հավաքած մասնակիցը խոստովանել էր, որ գրեթե առավելագույն արդյունքի հասնելու համար օգտագործել է մանրանկարահանող տեսախցիկ, սմարթֆոն և արհեստական բանականություն։

Դեպքը տեղի էր ունեցել համալսարանների ընդունելության կարևոր քննությունից՝ «Սունընգից», ընդամենը չորս օր առաջ։

Դրանից հետո իշխանությունները շտապ միջոցներ էին ձեռնարկել քննությունների ժամանակ խաբեությունը կանխելու համար։ Մասնավորապես, քննական կենտրոններում անջատվել էր հանրային Wi-Fi-ը, իսկ հագուստի կոճակների վրա հատուկ կպչուն պիտակներ էին փակցվել՝ թաքնված տեսախցիկների օգտագործումը կանխելու նպատակով։

Կրթության նախարարը քննությունից երեք օր առաջ խորհրդարանական լսումների ժամանակ հայտարարել էր, որ իր տարիքի պատճառով վստահ չէ, թե կկարողանա հայտնաբերել խաբեության փորձերը։ 72-ամյա պաշտոնյայի այս խոսքերը հանրային դժգոհություն էին առաջացրել։

Հրաժարականի մասին հայտարարությունում Չոյ Կյո Ջինը նշել է, որ թեև քննությունն անցել է առանց խոշոր միջադեպերի, իշխանությունները պատշաճ նախապատրաստական աշխատանք չեն իրականացրել։

«Այժմ, երբ քննությունն ավարտվել է, ես ստանձնում եմ ամբողջ պատասխանատվությունը և ներկայացնում հրաժարականս»,- գրել է նա X սոցիալական ցանցում։

Պաշտոնական տվյալներով՝ նոյեմբերի 19-ին անցկացված ընդունելության քննության ընթացքում էլեկտրոնային սարքերի օգտագործման հետ կապված արձանագրվել է կանոնների խախտման 111 դեպք։ Դրանցից գրեթե կեսը բացահայտվել է կառավարության ուղարկած երեք արտակարգ ծանուցումների միջոցով, որոնք օգնել են հայտնաբերել քննությունից առաջ չհանձնված հեռախոսները։

Հարավային Կորեայում ինը ժամ տևողությամբ «Սունընգ» քննությունը համարվում է երիտասարդների ապագայի համար կարևորագույն փորձություններից մեկը։ Դրա արդյունքները մեծապես ազդում են հեղինակավոր համալսարաններ ընդունվելու և հետագայում բարձր վարձատրվող աշխատանք գտնելու հնարավորությունների վրա։

Հետևեք մեզ Telegram-ում Telegram

Կարդալ ավելին

Տեղեկագիր

Բաժանորդագրվեք մեր տեղեկագրին և առաջինը ստացեք մեր շաբաթական ամփոփումները

Բաժանորդագրվելով Դուք տալիս եք համաձայնություն մեր համար։

EFCSNIFCNJTI

ՍիվիլՆեթն արգելում է օգտագործել իր հոդվածներն ու լուսանկարներն առանց պատշաճ հղման, ներբեռնել և առցանց այլ հարթակներում վերբեռնել իր պատրաստած և տարբերանշանը կրող տեսանյութերը։ ՍիվիլՆեթի տեսանյութերի մասնակի օգտագործումը կարող է լինել միայն ՍիվիլՆեթի գիտությամբ և համաձայնությամբ։

FacebookLogoInstagramLogoTiktokLogoTwitterLogoTelegramLogoYoutubeLogoMailLogo

Արդենի պողոտա 315, գրասենյակ 30 Գլենդել, Կալիֆոռնիա 91203

+1(818)749-450 [email protected]

Հյուսիսային պողոտա 1, գրասենյակ 30 Երևան 0010, Հայաստան

+374(10)500-119

CIVILNET © 2011-2026։ Բոլոր իրավունքները պաշտպանված են։

Մշակված է՝ -ում