Թաթուլ Հակոբյան
Օգոստոսի 31-ից սեպտեմբերի 4-ը Լիբանանից Լեռնային Ղարաբաղ է այցելում 57 գործարարներից կազմված պատվիրակություն, որը պաշտոնական հանդիպումներից բացի տեղում կծանոթանա Արցախի ինչպես ներդրումային հնարավորություններին, այնպես էլ ընթացիկ բիզնես և բարեգործական ծրագրերին:
Լիբանանյան կապիտալով Կիպրոսում գրանցված ԱՐԻ (Artsakh Roots Investment) ընկերությանը մաս են կազմում լիբանանահայ 85 գործարարներ: ԱՐԻ-ն ԼՂՀ իշխանությունների հետ համագործակցաբար ցածր տոկոսադրույքներով երկարաժամկետ վարկեր է տրամադրում Քաշաթաղի և Շահումյանի շրջանների (Մռավից՝ Արաքս) բնակիչներին: Անցնող երկու տարիների ընթացքում արդեն ավելի քան 600 ընտանիք օգտվել է ԱՐԻ-ի տրամադրած՝ գյուղատնտեսությունն ու անասնապահությունը վարկավորելուն և զարգացնելուն ուղղված պատեհությունից:
«Մեր ընկերության գործունեության հիմնական սկզբունքներն են կայուն և երկարաժամկետ վարկավորումը, թափանցիկությունն ու բաց հաշվետվությունը»,- ասում է ԱՐԻ-ի բաժնետերերից Բենիամին Բչաքչյանը:
Բազմաթիվ բարեգործական ծրագրերի կողքին, որոնք շարունակվում են արդեն տարիներ, լիբանանահայ գործարարները որոշել են իրական ներդրումներով մաս կազմել Արցախի վերականգնման և զարգացման համահայկական նպատակին: Բչաքչյանն ասում է, որ ԱՐԻ-ի նախագիծը պիտի օրինակելի ուղենիշ լինի նաև այլ երկրների հայ գործարարների համար:
Լիբանանահայ գործարարների 57-հոգանոց պատվիրակությունը Ստեփանակերտում հանդիպումներ կունենա նախագահ Բակո Սահակյանի և վարչապետ Արա Հարությունյանի հետ, կայցելի Շահումյանի և Քաշաթաղի շրջանների բազմաթիվ գյուղական բնակավայրեր, տեղերում կծանոթանա այն ընտանիքների հետ, որոնք արդեն օգտվել են ԱՐԻ-ի վարկերից:
Այցի ընթացքում Լիբանանի «Արցախ» ֆոնդի ներկայացուցիչները տասնյակ ընտանիքների կթու կովեր կնվիրեն: Արդեն հինգ տարի ֆոնդը կթու կով է տրամադրում Մռավից Արաքս ընկած բնակավայրերի բոլոր այն ընտանիքներին, որտեղ ծնվում է երրորդ և հաջորդ երեխան:
Պատմություններ
