Եվրամիության Խորհրդից ևս հաստատում են՝ Հայաստանը չէր միացել «Մագնիտսկու եվրոպական ցուցակին»

Անի Գրիգորյան, #CivilNetCheck 

Եվրոպական հանձնաժողովի մամուլի ծառայությունից հաստատում են, որ «Մագնիտսկու եվրոպական ցուցակի» վերաբերյալ որոշմանը Հայաստանի միանալու մասին հրապարակված տեղեկությունը վրիպակի արդյունք է եղել։ 

«Փաստն այն է, որ Հայաստանն ու Ադրբեջանը չեն միացել Խորհրդի (ԸԱԱՔ) 2023/2721 որոշմանը։ Խորհրդի կայքում դեկտեմբերի 17-ին հրապարակված հայտարարության առաջին տարբերակը, որտեղ նշվում էր, որ Հայաստանը և Ադրբեջանը հանդիսանում են գործընկեր երկրների թվում, ճիշտ չէր։ Դա տեխնիկական սխալ էր, որն ուղղվեց հաջորդ օրը։ Խորհրդի կայքում ներկայում տեղադրված տեղեկատվությունը ճիշտ տարբերակն է»,- նշված է պատասխանում։ 

Դեկտեմբերի 17-ին ԵՄ խորհուրդը տարածել էր եվրոպական դիվանագիտության ղեկավար Ժոզեպ Բորելի հայտարարությունը, որում նշվում էր, թե ԵՄ անդամ չհանդիսացող տասնմեկ երկիր՝ այդ թվում Հայաստանն ու Ադրբեջանը, միացել են ԵՄ խորհրդի՝ ընդհանուր արտաքին և անվտանգության քաղաքականության որոշմանը, որով պատժամիջոցներ են սահմանվում մարդու իրավունքների զանգվածային ոտնահարման համար պատասխանատու պաշտոնյաների, անձանց ու կազմակերպությունների դեմ։

Որոշմամբ խորհուրդը ևս տասներկու ամսով՝ մինչև 2024թ․ դեկտեմբերի 8-ը, երկարաձգել է գործող սահմանափակող միջոցները և փոփոխել սահմանափակող միջոցների ենթակա անձանց և կազմակերպությունների ցանկը։

Երկու օր անց, սակայն, հաղորդագրությունը խմբագրվել էր և Հայաստանի ու Ադրբեջանի անունը հեռացվել էր։ 

ՀՀ արտգործնախարարությունը նշել էր, որ Հայաստանի անունը նշվել էր տեխնիկական սխալմունքի պատճառով, և ԵՄ խորհրդի դեկտեմբերի 4-ի սահմանափակող միջոցների վերաբերյալ որոշմանը (2023/2721) ՀՀ-ն չի միացել։