Տարածվող տեսանյութում Թրամփի վրա կրակողը չէ

Հայկ Հովհաննիսյան, #CivilNetCheck

Լրատվամիջոցները հուլիսի 15-ին տարածում էին տեսանյութ՝ կից գրառմամբ, թե դրանում ԱՄՆ նախկին նախագահ Դոնալդ Թրամփի վրա մահափորձ կատարած 20-ամյա Թոմաս Քրուքսն է։

Տեսանյութում մեքենայում նստած երիտասարդն ասում է. «Իմ անունը Թոմաս Մեթյու Քրուքս է: Ես ատում եմ հանրապետականներին, ես ատում եմ Թրամփին։ Գիտե՞ք ինչ, դուք սխալ մարդու եք բռնել»։ 

Հրապարակումներում նշվում է, իբր Քրուքսը այն հրապարակել է Թրամփի վրա մահափորձից առաջ։

Տեսանյութը տարածել են Sputnik.armenia, 7or.am, asekose.am, hayeli.am, yerevan.today լրատվական կայքերը։ Այդ մասին գրել են նաև «Հայկական ժամանակը» և hանրայինի «Առաջին լրատվական ալիքը»։

Հուլիսի 13-ին Փենսիլվանիայի Բաթլեր քաղաքում Թրամփի քարոզարշավի միջոցառման ժամանակ կրակոցներ էին հնչել, ինչի հետևանքով մեկ մարդ զոհվել է և երկուսը՝ վիրավորվել: Թրամփն ականջի հատվածում վնասվածք էր ստացել, իսկ կրակող 20-ամյա Թոմաս Մեթյու Քրուքսը՝ սպանվել:

#CivilNetCheck-ը պարզել է, որ լրատվամիջոցների կողմից շրջանառվող տեսանյութում երիտասարդն իրականում Թրամփի դեմ մահափորձ կատարած Թոմաս Քրուքսը չէ։ 

Տեսանյութի երիտասարդը և կրակողը տարբեր մարդիկ են

Տարածվող տեսանյութում պատկերված երիտասարդը և Թրամփի վրա կրակած Թոմաս Քրուքսը, չնայած որոշակի արտաքին նմանություններին, տարբեր անձինք են։ 

Տեսանյութում @jewgazing անվամբ օգտատերն է, որը կատակով նմանակել էր Քրուքսին և տեսանյութը հրապարակել էր իր «X»-ի էջում՝ ի պատասխան այլ օգտատերերի, որոնք նրան նմանեցրել էին Թրամփի վրա կրակած անձին։ 

Տեսանյութից բացի, ավելի վաղ կատակասեր օգտատերը հրապարակել էր նաև լուսանկարներ, որտեղ իրեն նմանեցնում էր Թրամփի վրա կրակողին։ Սակայն որոշ ժամանակ անց երգիծական բնույթի նկարները և տեսանյութը սկսել են տարածվել որպես իրական՝ առանց նշումների, որ դրանք կրկնօրինակում են։ 

Ավելին, մի շարք հայտնի լրատվամիջոցներ, այդ թվում՝ Republic-ը, Times Now-ը և News24-ը օգտագործել էին այն իրենց հրապարակումներում։

Oգտատերը հետագայում արձագանքել է Թոմաս Քրուքսի մասին լուրերում իր լուսանկարների օգտագործմանը: Նա գրառումներ է արել, որտեղ զղջացել է անհաջող կատակի համար։ Այս իրադարձություններից հետո օգտատերը ջնջել է այդ տեսանյութերը և փակել «X»-ի իր օգտահաշիվը։ 

Ի՞նչ է հայտնի մահափորձ կատարած Թոմաս Քրուքսի մասին

Հանրահավաքի ժամանակ կատարված միջադեպից հետո ԱՄՆ Գաղտնի ծառայությունը հաղորդեց, որ հարձակվողը՝ 20-ամյա Թոմաս Քրուքսը, վնասազերծվել է։

CNN-ի փոխանցմամբ՝ Քրուքսը ավագ դպրոցը ավարտել էր 2022-ին։ Համադասարանցիները նրան նկարագրում են որպես լուռ և խելացի, սակայն տարբերվող։ Քրուքսի քաղաքական հայացքները հակասական էին. նա գրանցված էր որպես հանրապետական, բայց նվիրատվություն էր արել դեմոկրատական կազմակերպությանը։ ԱՄՆ հետաքննական մարմինները դեռ փորձում են պարզել հարձակման դրդապատճառները: