«Խնայբանկ»-ի փոխհատուցման հետ կապված որևէ նոր փոփոխություն չկա

Բազմահազար հետևորդներ ունեցող ֆեյսբուքյան էջեր պարբերաբար տարածում են գրառումներ՝ «հենց նոր պաշտոնապես որոշվեց․ ուշադրություն բոլոր նրանց, ովքեր ունեցել են ավանդ՝ «Խնայբանկ»-ում․ տեսեք, թե որքան փոխհատուցում է նախատեսված» բովանդակությամբ։ 

Գրառումներին կցված հոդվածում նշվում է, որ եթե նախկինում փոխհատուցում կարող էին ստանալ մինչև 1936-ը ծնվածները, ապա ներկայում նաև 1938-ին ծնվածները։

Արդյոք ավանդների փոխհատուցման հետ կապված փոփոխությո՞ւն է եղել

Չնայած, որ ֆեյսբուքյան էջերը լուրը տարածում են «հենց նոր պաշտոնապես որոշվեց» ձևակերպմամբ, այնուամենայնիվ, տարածվող լուրը հին է։

1938-ին ծնվածները, որոնք Խորհրդային Հայաստանի «Խնայբանկ»-ում ավանդ են ունեցել, փոխհատուցում ստացողների շարքում ընդգրկվել են ոչ թե վերջերս, այլ 2021-ին։ Ավելին, վերջին փոփոխություններով ավանդների փոխհատուցում կարող են ստանալ մինչև 1941-ին ծնվածները։   

Ո՞ր էջերն են տարածում փոփոխության հետ կապված լուրերը

Գրառումները պարբերաբար տարածում են ֆեյսբուքում 128 հազար հետևորդ ունեցող «Info Տեղեկատու» և 59 հազար հետևորդ ունեցող «Live Info» էջերը։

Այս էջերը փոխկապակցված են, դրանք համաժամանակյա ռեժիմով՝ նույն ժամին, նույն լուրերն են տարածում։

Նույն լուրը, նույն օրը նույն ժամին նախկինում տարածել են իրար հետ փոխկապակցված այլ ֆեյսբուքյան էջեր ևս։ 

Կցված կայքը ողողված է գովազդներով։ Ֆեյսբուքյան էջերը նման ձևակերպումներով լուրեր են տարածում կցված կայքի այցելությունները մեծացնելու և դրանից գովազդների հաշվին գումար աշխատելու համար։ 

Այսպիսով, ֆեյսբուքյան էջերի տարածած լուրը հին է։ Իսկ վերջին փոփոխություններով «Խնայբանկ»-ի ավանդների փոխհատուցում կարող են ստանալ մինչև 1941-ին ծնվածները։