Առաջադրանքներ կատարելու դիմաց գումար ստանալու բազմաթիվ կեղծ գովազդներ են շրջանառվում

Շուշան Ստեփանյան, Հայկ Հովհաննիսյան

Սոցցանցերում տարածվում են գովազդային գրառումներ, որոնցում առաջարկվում է արագ գումար աշխատել, այնինչ, իրականում, գումար է կորզվում։ 

#CivilNetCheck-ը գնացել է այդ հայտարարությունների հետքերով։

Ինչպե՞ս են տարածվում գովազդային գրառումները

«Blossom generosity achieve prosper» ֆեյսբուքյան էջը 2024-ի օգոստոսի 30-ին միանգամից տասնյակ նման գրառումներ է տարածել, որտեղ առաջարկում է առաջադրանքներ կատարելու միջոցով գումար վաստակել։ Նկատենք, որ գովազդային գրառումների համար էջը ղեկավարողները գումարներ են ներդրել։ Նույն օրը էջը նույնաբովանդակ հայտարարություններ է տարածել նաև անգլերենով։ Այսինքն, հայկական ֆեյսբուքյան տիրույթից բացի, թիրախավորել են նաև անգլալեզու տիրույթը։

Հղումով այցելելու դեպքում էջը տանում է Play Market, որտեղ առաջարկում է բեռնել Range անունով հավելվածը։ Հավելվածը նոր է Play Market-ում, դրա վերաբերյալ մանրասմներ չկան։ Ենթադրաբար, այս տարբերակով բարձրացնում են նաև նոր ստեղծված հավելվածի դիտելիությունը։

Հավելվածը բեռնելուց հետո կես դրույքով աշխատանքի վերաբերյալ հայտարարություններ են։ Դիմելու դեպքում այն տանում է WhatsApp հաղորդագրությունների հարթակ, որտեղ կապ հաստատած անձը ներկայանում է որպես Aliexpress կայքի խորհրդատու և առաջարկում վաճառքն ավելացնելու միջոցով գումար աշխատել։ Ըստ կայքի խորհրդատուի՝ հնարավոր է շահույթ ստանալ վաճառված ապրանքների «միջնորդավճարը»՝ կատարելով առաջադրանքներ հարթակում:

Հեշտ գումար աշխատել առաջարկող որոշ գրառումների դեպքում չկար որևէ հավելված, բայց դրանք նույնպես տանում էին WhatsApp հարթակ, որտեղ էլ Aliexpress-ում առաջադրաքներ կատարելու միջոցով գումար աշխատել են առաջարկում։

Իսկ WhatsApp-ով կապ հաստատած բոլոր օգտահաշիվների լուսանկարները վերցված են համացանցից։

Ինչպե՞ս են գումար կորզում

#CivilNetCheck-ը նախորդ հրապարակումներում անդրադարձել է թեմային։ 

Գումար աշխատելու համար պահանջվում է «աշխատանքային հաշիվ» ստեղծել իրենց կայքում, որը նմանակում է միջազգային Aliexpress կայքը։ Սկզբում Aliexpress-ը նմանակող կայքի հաշիվը լիցքավորվում է 1 000 դրամով, այնուհետև պահանջվում է ապրանքներ տեղադրել և դրա համար ստանալ «միջնորդավճարը»։ Ավելի ուշ, սակայն, պարզվում է, որ «վաճառքի շրջանը» փակելու համար անհրաժեշտ է համալրել հաշիվը։ 

Տեսականորեն ֆինանսական խարդախության զոհը երբեմն կարող է փոքր գումարներ հանել կայքի իր հաշվեկշռից։ Սակայն համակարգն այնպես է աշխատում, որ զոհերին մշտապես մի փոքր գումար է պակասում «վաճառքի շրջանը» փակելու համար, և նրանք ստիպված կլինեն ավելի ու ավելի շատ գումար ուղարկել, որպեսզի չկորցնեն նախկինում ներդրված գումարները։

Որոշ պահի, երբ ուղարկված գումարը բավականին մեծ կլինի, զեղծարարները այլևս գումար հետ չեն ուղարկի: Խաբեության այս տակտիկան կոչվում է «Խոզերի սպանդ», երբ զոհին վճարումներով գայթակղում են կատարելու ավելի մեծ ներդրումներ, ինչպես խոզերին են բտում մորթելուց առաջ:
#CivilNetCheck-ը նախորդ հրապարակումներում անդրադարձել է այս թեմային։ 

Այսպիսով, Aliexpress-ի անունից սոցցանցերում տարածվող գովազդային գրառումները՝ իբրև առաջադրանքներ կատարելու միջոցով գումար աշխատելու մասին, իրականում խաբեություն է։