CivilNetCheck
Civilnet
Շուշան Ստեփանյան, #CivilNetCheck
Սոցցանցերում տարածվում են գրառումներ՝ «Այ քեզ շոգ․ սկսվում է․ պատրաստվեք․ օդի ջերմաստիճանը…Մեզ միայն սա էր պակաս․ Սուրենյանը հայտնեց» վերտառությամբ։
Գրառումից տպավորություն է ստեղծվում, թե օդերևութաբան Գագիկ Սուրենյանը հայտնել է առաջիկա օրերին սպասվող սաստիկ շոգի մասին։ Այնինչ էջերը տարածում են հին լուրեր՝ դիտումներ ստանալու նպատալով։
Գագիկ Սուրենյանը՝ սունկ կայքերի թոփ «հերոս»
Գրառման մեջ և գրառմանը կցված հոդվածի վերնագրում նշվում է շոգերի մասին, այնինչ հոդվածում գրված է, որ սպասվում է առանց տեղումների եղանակ։ Ընդ որում՝ ոչ թե առաջիկա օրերի եղանակի կանխատեսումն է, այլ՝ ապրիլ-մայիս ամիսների։
Գրառումը տարածվում է «Հիդրոօդերևութաբանության և մոնիթորինգի կենտրոն»-ի տնօրենի տեղակալ Գագիկ Սուրենյանի լուսանկարով՝ վստահություն ներշնչելու համար և տպավորություն ստեղծելով, թե Սուրենյանն է կանխատեսման հեղինակը։ Այնինչ, Գագիկ Սուրենյանը երբևէ նման ձևակերպումներով գրառում չի արել։
Իսկ գրառմանը կցված հոդվածում «Հիդրոօդերևութաբանության և մոնիթորինգի կենտրոնի» ապրիլ-մայիս ամիսներին արված եղանակի կանխատեսումն է։
Ի՞նչ է հայտնի գրառումը տարածող ֆեյսբուքյան էջերի մասին
Գրառումները տարածող ֆեյսբուքյան էջերը փոխկապակցված են։ Դրանք տարածում են նույն գրառումները, իսկ Գագիկ Սուրենյանի անունից տարածվող գրառումը բոլոր էջերում տարածվել է նույն ժամին։
Սա առաջին դեպքը չէ, երբ Գագիկ Սուրենյանի անունից նմանատիպ կեղծ գրառումներ են տարածվում, ինչին #CivilNetCheck-ը պարբերաբար անդրադառնում է։
Եղանակի, հատկապես կտրուկ փոփոխությունների վերաբերյալ լուրերը մեծ տարածում ունեն հանրության շրջանում։ Այդ պատճառով սունկ կայքերը հաճախ նմանատիպ կեղծ լուրեր են տարածում՝ գրառումներին կցված կայքերի համար դիտումներ ապահովելու և դրանից գումար ստանալու համար։
Պատմություններ
