Լրատվամիջոցներն անհիմն պնդում են, թե Տիրան Խաչատրյանի հերոսի կոչումը չեղարկվելու է

Մի շարք լրատվամիջոցներ հունվարի 14-ին գրել են, թե գեներալ Տիրան Խաչատրյանի ազգային հերոսի կոչումը հետ է կանչվելու։

Նման վերնագրով հրապարակումներ արել են 1in.am, News.am, Lurer.com, Euromedia24.com, Amrtime.news և մի շարք այլ լրատվական կայքեր՝ որպես աղբյուր նշելով «Ժողովուրդ» օրաթերթը։

Սակայն «Ժողովուրդ» օրաթերթն իր սկզնաղբյուր հոդվածում նման պնդում չի արել։ Հոդվածը վերնագրված է հարցական ձևով՝ «Արդյո՞ք հետ կկանչվի Տիրան Խաչատրյանի հերոսի կոչումը», մինչդեռ բազմաթիվ լրատվամիջոցներ արտատպել են այն՝ վերնագրում հաստատական պնդմամբ։

Հրապարակման բովանդակությունը

Հոդվածում քննարկվում է, որ 44-օրյա պատերազմի ընթացքում ԳՇ պետի առաջին տեղակալ Տիրան Խաչատրյանը, որը 2020-ին արժանացել էր ազգային հերոսի կոչման, ներկայում մեղադրվում է նույն պատերազմին առնչվող գործով։ 2025-ի դեկտեմբերի 5-ին գեներալ Խաչատրյանը երկու ամսով կալանավորվեց։

Թերթը հարցումով դիմել է վարչապետի աշխատակազմին՝ պարզաբանումներ ստանալու նպատակով։ Մասնավորապես, հարց է ուղղվել, թե ինչու այսքան տարի անց է մեղադրանք առաջադրվել, ինչ հիմքով է տրվել հերոսի կոչումը և արդյոք այն հետ կկանչվի։

Վարչապետի աշխատակազմից ստացված պատասխանում նշվել է միայն, որ Խաչատրյանին հերոսի կոչում է տրվել ՀՀ զինված ուժերի գլխավոր շտաբի պետի միջնորդությամբ։ Հերոսի կոչումը հետ կանչելու վերաբերյալ հարցին վարչապետի աշխատակազմը չի պատասխանել։

Ազգային հերոսի կոչման չի կարող «հետ կանչվել»

Հայաստանի օրենսդրության համաձայն՝ ազգային հերոսի կարգավիճակը, որը տրվում է Հայրենիքի շքանշանով պարգևատրված անձանց, կարող է չեղարկվել միայն դատական կարգով։ Սա ամրագրված է «ՀՀ պետական պարգևների և պատվավոր կոչումների մասին» ՀՀ օրենքի 45-րդ հոդվածի 5-րդ մասում։

Սակայն հարկ է նշել, որ ՀՀ դատական օրենսգրքերում հստակեցված չեն պետական պարգևից կամ պատվավոր կոչումից զրկելու հատուկ դատական ընթացակարգերը։ Մասնավորապես, պարզ չէ, թե ով և ինչ կարգով պետք է դիմի դատարան՝ անձին պետական պարգևից զրկելու պահանջով։

Այսպիսով, լրատվամիջոցների կողմից տարածված պնդումները՝ Տիրան Խաչատրյանի հերոսի կոչումը հետ կանչելու մասին, անհիմն են և չեն համապատասխանում «Ժողովուրդ» օրաթերթի բնօրինակ հրապարակման բովանդակությանը։ Ավելին, նման որոշում կարող է կայացվել միայն դատական կարգով, ինչի վերաբերյալ որևէ տեղեկություն չկա։