Boeing 737-ի կործանման վերաբերյալ լուրը կեղծ է 

Շուշան Ստեփանյան, #CivilNetCheck

Սոցցանցերում բազմահազար հետևորդներ ունեցող էջեր տարածում են գրառումներ 132 ուղևոր փոխադրող Boing 737 ինքնաթիռի կործանման մասին։

«Ցավալի լուր․ 5 րոպե առաջ․ 132 ուղևոր տեղափոխող Boeing 737-ը կործանվել է․ դեպքի վայրից տեսանյութ է հրապարակվել»,- նշված է գրառման մեջ։ 

Մինչդեռ դեպքը հին է և որևէ կապ չունի Հայաստանի հետ։

Իրականում ե՞րբ և որտե՞ղ է տեղի ունեցել ավիավթարը

Գրառումը տարածվում է ֆեյսբուքյան մի շարք էջերով, որոնց թվում՝ «Newvideo.am1 Վիդեո պորտալ», «Հպարտ հայորդի», «Ես հայ եմ» անվանումներով էջերն են։ Այս ֆեյսբուքյան էջերը նույն ժամերին նույն լուրերն են տարածում։

Հրապարակմանը կցված են arm.arminfonews.ru և yer.arminfonews.ru կայքերերը։ Երկու կայքերն էլ գրանցված են Ռուսաստանում, իսկ ինքնաթիռի կործանման մասին լուրը երկուսում էլ գրված է միաժամանակ հայերեն և ռուսերեն լեզուներով։ Դրա նպատակը, ենթադրաբար, երկու լեզուներով խոսող լսարանին թիրախավորելն է։ 

Չնայած սոցցանցերում գրառումը տարածվում է՝ «ցավալի լուր․ 5 րոպե առաջ» ձևակերպումներով, գրառմանը կցված հոդվածներում չի նշվում, թե երբ և որտեղ է տեղի ունեցել ավիավթարը։ Այդպիսի ավիավթար տեղի էր ունեցել դեռ 2022-ին՝ Չինաստանում, երբ 132 ուղևոր տեղափոխող Boeing 737 ինքնաթիռը Կունմին քաղաքից թռչում էր Գուանչժոու։ 

Իսկ հին կամ կեղծ լուրեր տարածելու հիմնական նպատակը կցված կայքի այցելությունների թիվը մեծացնելն ու գովազդից եկամուտ ստանալն է։

Ուշադրություն գրավելու համար հաճախ օգտագործվում են նաև «5 րոպե առաջ», «հենց հիմա», «շտապ» ձևակերպումները։