Առևտրի կենտրոնում բռնկված հրդեհի վերաբերյալ գրառումները կեղծ են

Շուշան Ստեփանյան, #CivilNetCheck

Սոցցանցերի հայկական էջերում տարածվում են խուճապ տարածող գրառումներ՝ առևտրի կենտրոնում տեղի ունեցած հրդեհի վերաբերյալ։

«ՀՐԱՏԱՊ․ Մոլն այրվում է, զոհերի թիվն աներևակայելի է»,- նշված է գրառման մեջ, որին կցված է նաև լուսանկար։ 

Գրառումից տպավորություն է ստեղծվում, թե դեպքերը տեղի են ունեցել ներկայում և Հայաստանում, այնինչ լուրը հին է և որևէ կապ չունի Հայաստանի հետ։

Ուկրաինայի հրդեհը՝ հայաստանյան լսարանին մոլորեցնելու միջոց

Մանրամասների համար առաջարկվում է բացել մեկնաբանություններում տեղադրված տելեգրամյան էջը, որը տանում է դեպի «Փաստ» լրատվականի տելեգրամյան էջը։ 

Հրապարակմանը կցված է 2022-ին ռուսական հրթիռակոծության հետևանքով Ուկրաինայի Կրեմենչուկ քաղաքի առևտրի կենտրոնում բռնկված հրդեհի լուսանկարը։

Մեկնաբանություններում օգտատերերն իրենց դժգոհությունն են հայտնում՝ շեշտելով, որ լուրն իրականության հետ կապ չունի և միայն խուճապ է տարածում։

Հատկանշական է, որ ֆեյսբուքյան էջերը գրառումն արել են նույն օրը՝ նույն ժամին։

Մեկ ամիս առաջ ևս բազմահազար հետևորդներ ունեցող ֆեյսբուքյան այս էջերը նույն լուսանկարով ու բովանդակությամբ գրառումներ էին տարածել, ինչին ՍիվիլՆեթի փաստերի ստուգման թիմն անդրադարձել է։ 

Ենթադրաբար, այս գրառումների հիմնական նպատակը տելեգրամյան կամ ֆեյսբուքյան էջերի հետևորդների թիվն ավելացնելն է։ Նման ֆեյսբուքյան էջերը եկամուտ են ստանում կա՛մ կցված կայքի դիտումների հաշվին գովազդից ստացված եկամուտներից, կա՛մ մեծ թվով հետևորդներ հավաքելուց հետո էջերը վաճառվում են։