«730 օր գերությունից հետո». լուսանկարն իրականում ստեղծվել է ԱԲ-ի միջոցով

Շուշան Ստեփանյան, #CivilNetCheck

Սոցիալական ցանցերում լայն տարածում է ստացել մի լուսանկար, որտեղ, իբր, պատկերված է ռուսական գերությունից վերադարձած ուկրաինացի զինծառայողը՝ անճանաչելիորեն փոխված տեսքով։

«730 օր հետո ուկրաինացի զինվորը հետ է վերադարձել տուն ռուսական գերությունից»,- նշված է գրառման մեջ։

Օգտատերերը ակտիվորեն մեկնաբանում են լուսանկարը, սակայն իրականում այն ստեղծվել է արհեստական բանականության (ԱԲ) միջոցով։

Պատկերում առկա են որոշակի շեղումներ, մասնավորապես, լղոզված են հետևի պատկերները, ինչպես նաև զույգին պատկերող որոշակի հատվածներ։

Արհեստական բանականության նկարների հայտնաբերման հարթակները հաստատում են, որ լուսանկարն մասամբ կամ ամբողջությամբ ստեղծված է ԱԲ-ի միջոցով։ 

Վերջին անգամ Ռուսաստանն ու Ուկրաինան գերիների փոխանակում իրականացրել են հունիսի 26-ին։ Այն կայացել է հունիսի 2-ին Ստամբուլում Ռուսաստանի և Ուկրաինայի պատվիրակությունների միջև ձեռք բերված համաձայնության արդյունքում։

ԱԲ-ի միջոցով գեներացված նույնաբովանդակ լուսանկարները՝ իբր 730 օր գերության մեջ մնացած և գերությունից վերադարձած անձանց վերաբերյալ հրապարակումները մեծ տարածում ունեն սոցցանցերում։

Ուկրաինական «Իրինա Ուկրաինա» (Ірина Україна) տեղեկատվական տելեգրամյան ալիքը, որը հավաքագրում է անհետ կորած անձանց տվյալներ, նույնպես հրապարակել է այս կեղծ լուսանկարն ու նմանատիպ այլ օրինակներ՝ հորդորելով չտարածել ԱԲ-ով ստեղծված նկարներ։ Տելեգրամյան ալիքը զգուշացնում է, որ կեղծ լուսանկարները տարածվում են հավանումներ և բաժանորդագրություններ հավաքելու համար։

Այսպիսով, ռուսական գերությունից վերադարձած և անճանաչելիորեն փոխված ուկրաինացի զինվորականի լուսանկարն իրականում ստեղծվել է արհեստական բանականության միջոցով։