«Արթուր Օսիպյանը պիտի անհապաղ դադարեցնի հացադուլը, հասարակական ճնշումը պիտի մեծանա»
Հունիսի 5-ին լրանում է Արթուր Օսիպյանի հացադուլի ու կալանքի 18-րդ օրը: Հունիսի 2-ին մի շարք հասարակական կազմակերպություններ և անհատներ, այդ թվում՝ քաղաքացիական ակտիվիստ Սարինե Հայրիյանը, պաշտոնական պահանջ են ներկայացրել Հայաստանի գլխավոր դատախազ Աննա Վարդապետյանին՝ անհապաղ ազատ արձակել Օսիպյանին։
Սարինե Հայրիյանը խիստ անթույլատրելի է համարում իշխանությունների այն խոսույթը, որով փորձ է արվում արժեզրկել մարդկանց անցած ճանապարհը: «Չի կարելի այսքան գործիքայնացնել մարդկանց ցավը»,- ասում է նա։
Արցախցի քաղաքական գործիչ Արթուր Օսիպյանը ձերբակալվեց, այնուհետև կալանավորվեց՝ մայիսի 18-ին Երևանի Արաբկիր վարչական շրջանում Նիկոլ Փաշինյանի հետ ունեցած բանավեճից հետո։ Նրան մեղադրում են երեք հոդվածներով՝ բռնություն գործադրելու հրապարակային կոչերի, բռնությունը հրապարակայնորեն արդարացնելու կամ քարոզելու, խուլիգանության և քարոզչությանը խոչընդոտելու մեջ:
