Ռուսաստանն ու Հայաստանը պահպանում են մոտ դաշնակցային հարաբերություններ, սակայն դրանք մնում են բարդ՝ Արևմուտքի կողմից Հայաստանի վրա ազդեցությունն ուժեղացնելու և երկիրը սեփական շահերին ենթարկեցնելու փորձերի ֆոնին։ Այս մասին հայտարարել է Ռուսաստանի արտաքին գործերի նախարար Սերգեյ Լավրովը։
Ռուսաստանյան գերատեսչության ղեկավարի խոսքով՝ թեև Մոսկվան հարգում է իր գործընկերների ցանկացած ընտրություն, սակայն Երևանը պետք է հստակ գիտակցի, որ Եվրասիական տնտեսական միության (ԵԱՏՄ) շրջանակներում ստանձնած պարտավորությունները հնարավոր չէ պահպանել, եթե Հայաստանն ընտրի Եվրոպական միությանը միանալու ճանապարհը։
«Մենք կհարգենք մեր հայ ընկերների ցանկացած ընտրություն, բայց պետք է հասկանանք, որ ԵԱՏՄ-ի շրջանակներում պարտավորությունները չեն կարող պահպանվել, եթե Հայաստանը, ինչպես հայտարարվել է, ընտրի ԵՄ-ին միանալու ուղին», - նշել է նախարարը։
Լավրովը շեշտել է, որ առևտրային տարբեր ռեժիմների և այլ փոխբացառող պայմանավորվածությունների պատճառով երկու կառույցներին միաժամանակյա մասնակցությունը տնտեսական տեսանկյունից պարզապես անհնար է։
Այս դիրքորոշումը վերահաստատում է Ռուսաստանի նախագահ Վլադիմիր Պուտինի ավելի վաղ հնչեցրած նախազգուշացումներն առ այն, որ Հայաստանը պետք է վերջնականապես կողմնորոշվի իր արտաքին քաղաքական վեկտորի հարցում։ Մայիսի 9-ին ՌԴ նախագահը, պատասխանելով լրագրողների հարցերին, նշել էր, որ Հայաստանը պետք է որոշում կայացնի՝ մնա՞լ ԵԱՏՄ–ում, թե՞ քաղաքակիրթ ձևով ապահարզան պահանջել և գնալ ԵՄ։
Արձագանքելով Պուտինի հայտարարությանը, վարչապետ Փաշինյանը մայիսի 11-ին հայտարարել է, որ ԵԱՏՄ-ից դուրս գալու օբյեկտիվ անհրաժեշտությունը չկա։ Փաշինյանի խոսքով՝ իրենք հարգանքով են վերաբերվում ԵԱՏՄ գործընկերներին, և ԵԱՏՄ-ին Հայաստանի մասնակցությանը։ Նա շեշտել է, որ Հայաստանի իշխանությունները որդեգրել են բալանսավորված և բալանսավորման արտաքին քաղաքականություն, որի առանցքային սկզբունքներից մեկը հարգանքի և փոխադարձ շահերի ճանաչման վրա հիմնված հարաբերություններն են։
Պատմություններ
