Ֆոն դեր Լայենի այցի կարևոր հարցերից մեկը լինելու է հայկական մթերքի մուտքը ԵՄ շուկա․ Փաշինյան

Եվրոպական հանձնաժողովի նախագահ Ուրսուլա ֆոն դեր Լայենի հայաստանյան առաջիկա այցի օրակարգի կարևոր հարցերից մեկը լինելու է հայկական գյուղատնտեսական արտադրանքի մուտքի դյուրացումը Եվրոպական միության շուկա։ Այս մասին հայտնել է վարչապետ Նիկոլ Փաշինյանը հունիսի 25-ին կառավարությունում ճեպազրույցի ժամանակ։

«Հայաստանի արտաքին գործերի նախարար Արարատ Միրզոյանը վերջերս Բրյուսելում մասնակցել է Եվրոպական միության արտաքին գործերի նախարարների խորհրդի նիստին։ Հավանականություն կա, որ այս առումով Հայաստանը կունենա բացառիկ հնարավորություններ։ Հույս ունեմ, որ Եվրոպական հանձնաժողովի նախագահի հետ կհասցնենք նախագիծն ավարտին հասցնել, որպեսզի երևանյան այցի ընթացքում մենք իրար հետ այդ մասին հայտարարենք»,- ասել է Փաշինյանը։

Հունիսի սկզբին հայտնի դարձավ, որ Եվրամիությունը Հայաստանին ավելի քան 50 մլն եվրոյի անհապաղ ֆինանսական աջակցություն կտրամադրի՝ ի պատասխան Ռուսաստանի տնտեսական սահմանափակումների՝ ապահովելով հայկական ապրանքների մուտքը եվրոպական շուկա և խթանելով տարածաշրջանային ենթակառուցվածքների վերաբացումը։ 

Ուրսուլա ֆոն դեր Լայենի սպասվող այցի մասին նախօրեին հայտնել էր Politico-ն։

Պարբերականը նշել էր, որ Եվրոպական պատվիրակությունը, որի կազմում կլինի նաև ԵՄ ընդլայնման հարցերով հանձնակատար Մարտա Կոսը, Երևան կժամանի հունիսին կայացած խորհրդարանական ընտրություններում վարչապետ Նիկոլ Փաշինյանի արևմտամետ կուսակցության հաղթանակից հետո՝ որպես աջակցության բարձր մակարդակի դրսևորում։

Սա կլինի վերջին երկու ամսվա ընթացքում ֆոն դեր Լայենի երկրորդ այցը Հայաստան։ Մայիսին Եվրահանձնաժողովի նախագահը Երևանում էր՝ մասնակցելու Եվրոպական քաղաքական համայնքի գագաթնաժողովին, որը հյուրընկալել էր Հայաստանը, որից հետո նաև ներկա էր գտնվել ԵՄ-Հայաստան անդրանիկ համաժողովին։