Իսրայելի կառավարությունը քվեարկեց Հայոց ցեղասպանությունը ճանաչելու օգտին

Իսրայելի կառավարությունը հունիսի 28-ին պաշտոնապես քվեարկեց Հայոց ցեղասպանությունը ճանաչելու օգտին՝ հավանություն տալով արտաքին գործերի նախարար Գիդեոն Սաարի կողմից անցած շաբաթ ներկայացված բանաձևի նախագծին։ Գրում է The Jerusalem Post-ը։

«Երբեք ուշ չէ ճիշտ քայլն անելու համար»,- քվեարկությունից հետո հայտարարել է Սաարը։

Բանաձևն այժմ ներկայացվելու է Իսրայելի խորհդարան՝ Կնեսետի լիագումար նիստ՝ վերջնական քվեարկության։

«Օսմանյան կայսրության վերջին տարիներին հայ ժողովրդի նկատմամբ իրականացված ցեղասպանության ճանաչումը թե՛ բարոյական, թե՛ պատմական պարտականություն է։ Մենք պետք է նաև վճռականորեն դատապարտենք պատմական ճշմարտության ցանկացած ժխտում, նսեմացում կամ խեղաթյուրում»,- հինգշաբթի X-ի իր գրառմամբ նշել էր Սաարը՝ հայտարարելով բանաձևի ներկայացման մասին։

Իսրայելի արտաքին գործերի նախարարությունը ևս իր հայտարարության մեջ նշել է, որ թեև Հայոց ցեղասպանությունը լայնորեն փաստագրված է, այն ենթարկվել է «ինստիտուցիոնալացված ժխտման և նսեմացման արշավի», որի գլխավոր նախաձեռնողը Թուրքիան է։

․․․

Հայոց ցեղասպանության հարցը ժամանակ առ ժամանակ բարձրացվել է Իսրայելի քաղաքական շրջանակներում՝ հասնելով ընդհուպ օրենսդրական նախաձեռնությունների, սակայն որպես կանոն կասեցվել է երկրի իշխանությունների կողմից։ Առաջնորդվելով ռեալպոլիտիկի տրամաբանությամբ՝ Իսրայելը չի ցանկացել սրել կամ փչացնել հարաբերությունները Թուրքիայի և Ադրբեջանի հետ։

Տե՛ս՝ Ինչու է Իսրայելը կրկին հիշել Հայոց ցեղասպանությունը։