«Ստացեք լրացուցիչ եկամուտ՝ SOUQ-ում պատվերներ կատարելով»․ ինչ է թաքնված առաջարկի հետևում

Սոցցանցերում տարածվում են գովազդային գրառումներ, որոնցում առաջարկվում է «SOUQ հարթակում» պատվերներ կատարելու դիմաց եկամուտ ստանալ։ 

«Հիանալի հնարավորություն Հայաստանից։ Ստացեք լրացուցիչ եկամուտ՝ կատարելով պատվերներ SOUQ հարթակում։ Միացեք հիմա՝ տեղերը սահմանափակ են»,- նշված է գրառմանը կցված տեսանյութում։

Մինչդեռ գրառմանը կցված հղումը տանում է բոլորովին այլ հարթակ, որտեղ օգտատերը գումար աշխատելու փոխարեն կարող են ֆինանսական կորուստներ կրել։ 

Ի՞նչ է խոստանում գովազդը և ո՞ւր է տանում հղումը 

Գովազդային գրառումները տարածվում են Nltunkayi ֆեյսբուքյան էջի միջոցով, որի անվանումը որևէ հստակ իմաստ կամ նույնականացնող տեղեկություն չի պարունակում։ Էջը որևէ ակտիվություն չունի։ Այն ստեղծվել է 2026-ի օգոստոսի 18-ին և ունի ընդամենը 6 հետևորդ։ 

Գովազդային գրառումների տեքստը նույնն է, փոխվում են միայն կից տեսանյութերը։ Օգոստոսի 31-ի դրությամբ էջում հրապարակված է եկամուտ խոստացող 19 նույնաբովանդակ գովազդ։ 

Գրառման տեքստը, ըստ արհեստական բանականության կիրառումը հայտնաբերող գործիքների, մեծ հավանականությամբ գեներացվել է ԱԲ-ի միջոցով։ Տեքստը բնական հայերենով չէ և որևէ հստակ բովանդակային իմաստ չի արտահայտում։ 

Գրառմանը կցված տեսանյութերը հիմնականում վերցված են համացանցից, սակայն ներկայացված են փոփոխված ուղեկցող տեքստերով։ Օրինակ՝ դրանցից մեկը վերցված է Pinterest-ից, որտեղ այն հրապարակվել է այլ նկարագրությամբ։

Թեև գրառման մեջ նշված է, որ գումար հնարավոր է աշխատել SOUQ հարթակով։ Դրան կցված է բոլորովին այլ՝ ztm5e[.]top պատահական տառերի համադրությամբ կայք։ Հատկանշական է, որ այս կայքը ևս վերջերս է ստեղծվել է՝ օգոստոսի 26-ին։

Կայքում իբր մեկնաբանություններ թողած «աշխատակիցների» լուսանկարները վերցված են համացանցից։

.top վերջավորությամբ դոմեյնները, որպես կանոն, ավելի մատչելի են, քան .com, .am և այլ տարածված դոմեյնները։ Այդ պատճառով զեղծարարները հաճախ ընտրում են նման դոմեյններ, դրանք օգտագործում կարճ ժամանակով, ապա իրենց նպատակին հասնելուց հետո փակում կայքերը։

SOUQ-ի պատմությունը՝ Amazon-ից հետո 

SOUQ.com-ը արաբական աշխարհի ամենամեծ առցանց մանրածախ առևտրի հարթակներից էր։ 2017-ին ամերիկյան Amazon ընկերությունը գնել է հարթակը, իսկ 2019-ին Արաբական Միացյալ Էմիրություններում գործարկվեց նոր կայք՝ Amazon.ae։

Ներկայում SOUQ.com-ի հասցեն վերահասցեագրում է օգտատիրոջը Amazon.ae կայք։ Արաբական մյուս երկրներում՝ Սաուդյան Արաբիայում և Եգիպտոսում, SOUQ-ի կայքերը նույնպես հետագայում վերանվանվել են։ 2020-ին Սաուդյան Արաբիայում կայքը դարձել է Amazon.sa, իսկ 2021-ին Եգիպտոսում՝ Amazon.eg։

Այսինքն՝ ներկայում SOUQ անունով հարթակ չի գործում, որը հնարավորություն կտար գումար աշխատել։ 

Գումար աշխատելու առաջարկից՝ գումար ներդնելու պահանջ 

Վերջերս կրկին ակտիվացել են պարզ առաջադրանքներ կատարելով եկամուտ ստանալու առաջարկները։ #CivilNetCheck-ը նախկինում ևս անդրադարձել է նմանատիպ գրառումներին։ Թեև դրանց տեքստերը փոքր-ինչ տարբերվել են, բոլոր դեպքերում խոստացվել է հեշտ եկամուտ, իսկ կից հղումները տարել են նույն արտաքին տեսքով և բովանդակությամբ կայքեր։

«Աշխատանք տնից»․ սոցցանցերում ակտիվացել են հեշտ եկամուտ խոստացող կասկածելի էջերը

Հղմամբ անցնելուց հետո օգտատերը տեղափոխվում է WhatsApp, որտեղ նրան ուղղորդում են մեկ այլ կայք։ Այնտեղ անհրաժեշտ է գրանցվել և ուղարկել գրանցումը հաստատող էկրանապատկերը։ Դրանից հետո նրան փոխանցվում է Տելեգրամի օգտահաշվի հղում՝ հետագա հաղորդակցությունը շարունակելու համար։

Բոլոր դեպքերում կիրառվում է նույն սխեման․ օգտատիրոջը տարբեր սոցիալական ցանցերի և կայքերի միջոցով ուղղորդելուց հետո հայտնում են, որ «աշխատանքը» սկսելու համար անհրաժեշտ է նախապես գումար ներդնել։

Նման հարթակներում գումար ներդնելը կարող է ֆինանսական ռիսկեր պարունակել։ Օգտատերը որևէ երաշխիք չունի, որ կկարողանա եկամուտ ստանալ կամ հետ ստանալ փոխանցած գումարը։