Ադրբեջանը Հայաստանի հետ աշխատում է փոխադարձ առևտրի ծավալների ավելացման ուղղությամբ. Ալիև

Ադրբեջանը Հայաստանի հետ համատեղ աշխատում է փոխադարձ առևտրի ծավալների ավելացման ուղղությամբ։ Ադրբեջանական Report-ի փոխանցմամբ՝ այս մասին հայտարարել է Ադրբեջանի նախագահ Իլհամ Ալիևը՝ ելույթ ունենալով Բիշքեկում Շանհայի համագործակցության կազմակերպության գագաթնաժողովին։

«Հայաստանի հետ համատեղ աշխատում ենք փոխադարձ առևտրի ծավալների ավելացման, ապրանքատեսականու ընդլայնման և ցամաքային տրանսպորտային նոր հաղորդակցությունների ստեղծման ուղղությամբ», - հայտարարել է Ալիևը։

Ադրբեջանի նախագահը նշել է, որ իր երկիրն արդեն նավթամթերք է մատակարարում Հայաստան և ապահովում երրորդ երկրների բեռների տարանցումը։

Ադրբեջանին առաջիկայում ապրանքներ վաճառելու՝ Հայաստանի մտադրության մասին նախօրեին հայտարարել է արտաքին գործերի նախարար Արարատ Միրզոյանը։ Հանրային հեռուստաընկերության հետ զրույցում նա ասել է, որ առաջիկայում Հայաստանի և Ադրբեջանի միջև առևտուրը կդառնա երկկողմ։ 

«Այս քանի օրը դուք կիմանաք, որ ադրբեջանական ընկերությունները հայկական ընկերություններից ապրանք գնեցին։ Հիմա Հայաստանը կվաճառի ապրանք։ Հիմա կլինի առք և վաճառք»,- ասել է Միրզոյանը։

Կարդացե՛ք նաև՝ Հայաստանն Ադրբեջանին առաջիկայում ապրանք կվաճառի․ Արարատ Միրզոյան