ԵՄ Խորհուրդը հավանություն է տվել Հայաստանից ԵՄ արտահանումների 80%-ի ազատականացմանը

ԵՄ խորհուրդը հավանություն է տվել հայկական ապրանքների արտահանման մոտ 80%-ն ազատականացնելու ժամանակավոր միջոցառումներին՝ ի աջակցություն Հայաստանի տնտեսության: Այս մասին հայտնում են Հայաստանում Եվրոպական միության պատվիրակությունից։

Արտոնյալ համաձայնագիրը գործելու է որոշակի պայմաններով և ներառում է պաշտպանական մեխանիզմներ՝ ԵՄ շուկան պաշտպանելու համար, եթե ներմուծումը բացասական ազդեցություն ունենա ԵՄ արտադրողների վրա:

«Խորհուրդն առանց փոփոխությունների հավանության է արժանացրել Հանձնաժողովի առաջարկը՝ հարթելով կանոնակարգի արագ ընդունման ճանապարհն այն բանից հետո, երբ Եվրախորհրդարանը ևս, ինչպես ակնկալվում է, առանց ուղղումների կհաստատի այն»,- ասված է հաղորդագրության մեջ։

Երևանում հունիսի 2-ին վարչապետ Նիկոլ Փաշինյանի հետ բանակցություններից հետո կայացած համատեղ ասուլիսի ժամանակ Եվրահանձնաժողովի նախագահ Ուրսուլա ֆոն դեր Լայենը հայտարարել էր, որ Բրյուսելը կազատականացնի դեպի Եվրամիության շուկաներ Հայաստանի արտահանումների շուրջ 80%-ը և կտրամադրի ֆինանսական փաթեթներ՝ օգնելով Երևանին դիվերսիֆիկացնել իր տնտեսությունը և դիմակայել Մոսկվայի կողմից աճող ճնշումներին:

Որպես Ռուսաստանից տնտեսական կախվածության թուլացման գործնական քայլ՝ ԵՄ-ն Հայաստանի համար կներդնի Ինքնավար առևտրային միջոցներ, որոնք զրոյացնելու են մաքսատուրքերը հայկական ապրանքների գերակշիռ մասի համար: