Հայաստանը Ադրբեջան է արտահանել ալյումինե փայլաթիթեղ․ Պապոյան

Հայաստանը Ադրբեջան է արտահանել ալյումինե փայլաթիթեղ․ այդ մասին սեպտեմբերի 24-ի կառավարության նիստից հետո լրագրողների հետ զրույցում հայտարարեց ՀՀ էկոնոմիկայի նախարար Գևորգ Պապոյանը՝ նշելով, որ մանրամասները հետագայում կտրամադրվեն։

Պապոյանը չհայտնեց, թե ինչ քանակությամբ ալյումինե փայլաթիթեղ է արտահանվել Ադրբեջան և ինչ արժեք է ունեցել գործարքը։

Օգոստոսի 31-ին ՀՀ արտաքին գործերի և միջազգային առևտրի նախարար Արարատ Միրզոյանը հայտարարեց, որ առաջիկայում Հայաստանի և Ադրբեջանի միջև առևտուրը կդառնա երկկողմ։ Նա նշեց, որ ադրբեջանական ընկերությունները հայկական ընկերություններից ապրանք են գնել, իսկ Հայաստանը ևս պատրաստվում է Ադրբեջանին ապրանք վաճառել։

Հայաստանի և Ադրբեջանի միջև առևտրային կապերի զարգացումը վերջին տարում ակտիվացել է։

Ադրբեջանի պետական մաքսային կոմիտեի 2026-ի հունվար-հունիս ամիսների վիճակագրության համաձայն՝ առաջին կիսամյակում  Հայաստանից ներմուծել է ընդամենը 960 ԱՄՆ դոլարի ապրանք։ 

ՊԵԿ տվյալների համաձայն՝ 2025-ի առաջին կիսամյակում Ադրբեջանից Հայաստան ապրանքների ներմուծում ընդհանրապես չի իրականացվել։ Մինչդեռ 2026-ի նույն ժամանակահատվածում Ադրբեջանից Հայաստան ներմուծվել է 17,9 մլն դոլարի ապրանք։ Ներմուծման ճնշող մեծամասնությունը՝ ավելի քան 99 տոկոսը, կազմել են նավթը և նավթամթերքը։ Մասնավորապես, Հայաստան է հասել ավելի քան 14,000 տոննա նավթամթերք՝ ավելի քան 17 մլն դոլար արժողությամբ։ Բացի վառելիքից, ներմուծվել է նաև 31 տոննա պլաստմասսայից շինարարական դետալներ՝ շուրջ 109,000 դոլար ընդհանուր արժողությամբ։

Հայաստան ադրբեջանական արտադրանքի առաջին խմբաքանակներից մեկը հասել էր 2025-ի դեկտեմբերին․ Վրաստանի տարածքով Հայաստան էր ժամանել ադրբեջանական SOCAR ընկերության մոտ 1,300 տոննա բենզինով բեռնված 22 վագոնից բաղկացած գնացք։

Միաժամանակ, Հայաստանի իշխանությունները հայտարարել էին նաև հակառակ ուղղությամբ առևտրի մեկնարկի մասին։