Լեհաստանի նախագահը վարչապետին մեղադրել է Սահմանադրական դատարանը զավթելու փորձի մեջ

Լեհաստանի նախագահ Կարոլ Նավրոցկին վարչապետ Դոնալդ Տուսկին մեղադրել է երկրի Սահմանադրական դատարանը բռնի կերպով վերահսկողության տակ վերցնելու փորձի մեջ։ Նախագահը պաշտպանել է դատարանի կասեցված նախագահ Բոգդան Շվիեչկովսկուն։

Հոկտեմբերի 30-ին Սահմանադրական դատարանի դատավոր Աննա Կորվին-Պիոտրովսկին կասեցրել է Շվիեչկովսկու լիազորությունները՝ ստանձնելով դատարանի ղեկավարումը։ Որոշումը հանգեցրել է երկրի նախագահի և վարչապետի միջև լարվածության սրմանը։

Նավրոցկին տեղի ունեցածը որակել է որպես պետական մարմնի բռնի զավթում և կոչ արել հրատապ քաղաքական խորհրդակցություններ անցկացնել։

Վարչապետ Դոնալդ Տուսկը, իր հերթին, հայտարարել է, որ կառավարությունը փորձում է վերականգնել երկրում իրավունքի գերակայությունը։

Սահմանադրական դատարանի շուրջ հակամարտությունը Լեհաստանում շարունակվում է տարիներ շարունակ։ 2023-ին իշխանության եկած Տուսկի եվրոպամետ կառավարությունը հայտարարել է դատական համակարգը բարեփոխելու և դատարանների անկախությունը վերականգնելու մտադրության մասին։

Սակայն նախկին ազգայնական իշխանությունների դաշնակից նախագահ Կարոլ Նավրոցկին դեմ է կառավարության մի շարք քայլերին։ Տարաձայնությունները խորացել են նաև դատավորների նշանակման և նրանց լիազորությունների ճանաչման հարցերում։