Առցանց «աշխատանքի» խոստումներ․ ինչպես են ԱԲ հնարքներով ու գրավիչ առաջարկներով գումարներ կորզում

Սոցիալական ցանցերում հոկտեմբերի 30-ից գովազդի միջոցով տարածվում են տեսանյութեր, որոնցում առաջարկվում է հեռախոսի միջոցով կարճ ժամանակում գումար աշխատել:

«Յուրաքանչյուր առաջադրանքի համար կարող եք ստանալ 500 դրամ։ Ուզում եք իմանալ, թե ինչպես՝ սեղմեք տեսանյութի ներքևում՝ մանրամասների համար»,- տեսանյութերից մեկում ասում է «քաղաքացին»:

Ֆեյսբուքյան այս տեսանյութերին կից գրառումները բոլոր դեպքերում նույնական են և չեն պարունակում որևէ կոնկրետ տեղեկություն։ Դրանցում օգտագործվում են «ընտանեկան ջերմության», «օրվա ռիթմի» և «թվային հնարավորությունների» մասին վերացական ու հուզական ձևակերպումներ։

#CivilNetCheck-ի ուսումնասիրությունը ցույց է տվել, որ արագ և հեշտ եկամուտ խոստացող այս տեսանյութերը ստեղծվել են արհեստական բանականությամբ և օգտագործվում են որպես գովազդային խայծ։ Դրանցում ներկայացվող առաջարկները կարող են մոլորեցնել օգտատերերին և խոստացված եկամտի փոխարեն հանգեցնել ֆինանսական կորուստների։

ԱԲ-ով մշակված տեքստեր, տեսանյութեր և .xyz տիրույթով կայք

Տեսանյութերը գովազդվում են ֆեյսբուքյան Lydia Young Meadow և Aurora Flores Spring էջերով, որոնք ստեղծվել են հոկտեմբերի 6-ին։ Էջերում ընդհանուր առմամբ տարածվում է 43 նմանատիպ ակտիվ գովազդ։

Արհեստական բանականության հայտնաբերման գործիքների համաձայն՝ թե՛ տեքստերը, թե՛ տեսանյութերը պատրաստվել են ԱԲ-ի միջոցով։

Տեսանյութերն իբր ուղղորդում են lragir[.]am լրատվական կայք, սակայն իրականում տանում են 9tul6[.]xyz կայք։ Այնտեղ տեղադրված «նախագծի ղեկավարի» և «մասնակիցների» լուսանկարները վերցված են համացանցից։

Զեղծարարները հաճախ օգտագործում են էժան դոմեններ, այդ թվում՝ .xyz վերջավորությամբ, քանի որ դրանք թույլ են տալիս քիչ ծախսով կայքեր ստեղծել, իսկ կարճ ժամանակ անց փակել դրանք։

WhatsApp-ից Telegram․ ավտոմատացված նամակագրություն և գումարի կորզման սխեման

Կայքում առաջարկվում է «առցանց տվյալների մասնագետի» աշխատանք՝ օրական 50 000-ից 300 000 դրամ եկամտի խոստումով։ Ըստ հայտարարության՝ աշխատանքը ենթադրում է Alibaba հարթակի պատվերների սպասարկում անմիջապես հեռախոսով՝ միջազգային էլեկտրոնային առևտրի նախագծի շրջանակում:

Կայքում տեղադրված հղումն օգտատերերին ուղղորդում է WhatsApp՝ «մենեջերի» հետ կապ հաստատելու համար։ #CivilNetCheck-ը նույնպես կապ է հաստատել նրա հետ։ Զրուցակիցը ներկայացել է որպես «նախագծի համակարգող Մայա» և նախ հետաքրքրվել դիմողի սեռով ու տարիքով, ապա առաջարկել հեռախոսով՝ տնից աշխատելու հնարավորություն։ Աշխատանքը, ըստ նրա, ենթադրում է հայտնի առցանց հարթակներում վաճառողների պատվերների սպասարկում՝ օրական 50 000-ից 300 000 դրամ եկամտի խոստումով։

Աշխատանքը սկսելու համար «մենեջերն» առաջարկում է անվճար գրանցվել am.vip03[.]xyz կայքում՝ խոստանալով 1000 դրամ պարգևավճար։ Գրանցումից հետո օգտատերը պետք է ուղարկի դա հաստատող էկրանապատկերը։

Հաշվի ակտիվացումից հետո «մենեջերն» օգտատիրոջն ուղղորդում է Telegram՝ տրամադրելով «ընդունարանի աշխատակցի» հաշիվը (@Veronica542980)։ Նա հորդորում է կապ հաստատել վերջինիս հետ, հետևել նրա հրահանգներին և կատարված քայլերը հաստատող էկրանապատկերներ ուղարկել։ Միաժամանակ խոստանում է, որ աշխատանքի յուրաքանչյուր հաջորդ մակարդակում վարձատրությունը կավելանա։

Telegram-ում «Վերոնիկա» անունով օգտատերը ներկայանում է որպես Shein-ի ներկայացուցիչ և առաջարկում կես դրույքով աշխատանք՝ խոստանալով 10-15 րոպեում վաստակել 3 000-4 000 դրամ, իսկ օրական՝ 50 000-100 000 դրամ։ ԱԲ պատկերների հայտնաբերման գործիքի գնահատմամբ՝ նրա պրոֆիլի լուսանկարը մեծ հավանականությամբ ստեղծվել է ԱԲ-ով։

«Մենեջերը» նախ պահանջում է միանալ «Shein-ի աշխատանքային խումբ» Telegram-յան ալիքին, ապա հայտնում, որ գրանցման դիմաց տրամադրված 1000 դրամ բոնուսը բավարար չէ։ VIP 1 մակարդակն ակտիվացնելու և «միջնորդավճարներ վաստակելու» համար նա պահանջում է ևս 2000 դրամ փոխանցել տրամադրած բանկային քարտին և ուղարկել վճարման էկրանապատկերը։

#CivilNetCheck-ը Telegram-ի որոնողական բոտի միջոցով պարզել է, որ «Վերոնիկայի» հաշիվը կապված է հնդկական հեռախոսահամարների հետ։ Հաշվի պատմության համաձայն՝ օգտանունը նախկինում եղել է «Shraddha_oo5», իսկ նոյեմբերի 4-ին փոխվել է «Veronica»-ի։

Ուշագրավ է, որ երկու մեսենջերներում էլ ծավալուն հաղորդագրություններն ու հրահանգներն ուղարկվում էին վայրկյանների ընթացքում։ ԱԲ հայտնաբերման գործիքի գնահատմամբ՝ այդ տեքստերը ևս մեծ հավանականությամբ ստեղծվել են արհեստական բանականությամբ։

Այսպիսով, հեռախոսով բարձր եկամուտ խոստացող գովազդների հետևում ֆինանսական խարդախության սխեմա է։ ԱԲ-ով ստեղծված տեսանյութերի և հաղորդագրությունների միջոցով, ներկայանալով Alibaba-ի ու Shein-ի աշխատակիցներ, օգտատերերից պահանջում են անձնական տվյալներ և կանխավճարներ՝ խոստացված եկամտի փոխարեն նրանց կանգնեցնելով ֆինանսական կորուստների վտանգի առաջ։

Տես նաև՝ Հեշտ եկամտի խայծը․ նախ՝ առաջադրանքներ, հետո՝ գումար ներդնելու պահանջ: